Тошкент вилоятида ички ишлар органлари тизимида фаолият юритаётган бир неча раҳбарлар лавозимидан озод этилди. Бу ҳақда Тошкент вилояти ИИББ ахборот хизмати «Дарё»га хабар берди.
Жорий йилнинг 11 февраль куни вилоят ҳокимлиги мажлислар залида вазирнинг биринчи ўринбосари, полковник Азиз Тошпўлатов ҳамда Тошкент вилояти ҳокими Рустам Холматов бошчилигида ўрганишлар якунига бағишланган кенгайтирилган видеоселектор йиғилиши ўтказилди.
Йиғилишда вилоятдаги жорий криминоген вазият, унинг барқарорлигини таъминлаш борасида амалга оширилаётган чора-тадбирлар танқидий руҳда таҳлил қилиниб, келгусидаги вазифалар қизғин муҳокама этилди.
Шунингдек, ҳар бир шаҳар-туман, маҳалла кесими бўйича ҳамкорликдаги масъул ташкилотларнинг бу борада амалга оширилган ва оширилаётган ишлар сарҳисоби тингланиб, фаолиятлари бўйича якуний хулосалар чиқарилди.
Жумладан, Янгийўл туманида 2019 йил давомида ва 2020 йил январь ойида содир этилган жиноятлар сони ошиб кетганлиги ва хизмат фаолиятида қатор камчиликларга йўл қўйганлиги учун Янгийўл тумани ИИБ Жиноят қидирув бўлими бошлиғи ҳамда туман ИИБ бошлиғининг биринчи ўринбосари, шунингдек, хизмат фаолиятида бир қатор камчиликларга йўл қўйганлиги учун Янгийўл шаҳар ИИБ бошлиғи, Чирчиқ шаҳар ИИБ таянч пунктларининг 2 нафар профилактика инспектори эгаллаб турган лавозимидан озод этилди. Оҳангарон шаҳар ички ишлар органларининг 2 нафар профилактика инспектори унвонини бир поғона пасайтириш бўйича қарор қабул қилинди.
Вилоят ҳудудида криминоген вазият барқарорлигини таъминлаш борасида тизимли камчиликларга йўл қўйганлигини тушуниб етган Тошкент вилояти ИИББ жиноят қидирув бошқармаси бошлиғи эгаллаб турган лавозимидан озод этилди.
Аввалроқ ички ишлар вазири Пўлат Бобожонов Навоийда қатор ички ишлар ходимларини ишдан бўшатгани ҳақида хабар берилган эди.
4 февраль куни ҳам Пўлат Бобожонов Бухоро ИИБ тизимидаги қатор бошлиқ ва инспекторларни ишдан олган эди. Шунингдек, жорий йилнинг январь ойида Сурхондарёда ҳам қатор ички ишлар ходимлари ишдан бўшатилганди.
Изоҳ (0)