Ўзбекистоннинг Санкт-Петербург шаҳридаги бош консулхонаси 7 февраль куни шаҳар истироҳат боғларидан бирида тўрт нафар шахс Ўзбекистон фуқароси С.Н.га ҳужум қилгани тўғрисида тарқалган хабарни тасдиқлади. Бу ҳақда Ташқи ишлар вазирлиги хабар берди.
Таъкидланишича, Ўзбекистон фуқаросига 26-сон шаҳар шифохонасида зарур тиббий ёрдам кўрсатилганидан сўнг рухсат берилган.
Ҳуқуқни муҳофаза қилувчи органлардан олинган маълумотга кўра, мазкур ҳолат бўйича жиноий иш қўзғатилган, ушбу жиноятни содир этганликда гумонланаётганлар қўлга олинган. Тергов тадбирлари давом этмоқда.
Бош консулхона вазиятни ўз назоратига олган.
Ўзбекистон Ташқи меҳнат миграцияси агентлигининг Россиядаги ваколатхонаси аниқлаган маълумотларга кўра, жабрланувчи яшайдиган квартирасига ўзи етиб борган ва тез ёрдам чақирган. Унга дарҳол тиббий хизмат кўрсатилган. Ҳозирда унинг аҳволи қониқарли.
Консуллик-ҳуқуқий департаменти Россиянинг Шимоли-ғарбий федерал округи (Архангельск вилояти, Калининград вилояти, Карелия Республикаси, Коми Республикаси, Ленинград вилояти, Мурманск вилояти, Ненес автоном округи, Новгород вилояти, Псков вилояти, Санкт-Петербург шаҳри, Вологда вилояти) ҳудудида бўлиб турган фуқаролар зарур вазиятларда мамлакатнинг Санкт-Петербург шаҳридаги бош консулхонасига қуйидаги телефон рақами орқали мурожаат қилиши мумкинлигини эслатиб ўтган: +7-965-029-41-49.Эслатиб ўтамиз, Петербургда ўсмир йигит 25 ёшли ўзбекистонлик мигрантнинг юзига қарата ўқ узган эди. Йигит ўзининг бу қилмишини 2 йил аввал мактабда Ўрта Осиёдан бўлган болалар уни таҳқирлаганига жавоб сифатида изоҳлаган.
Изоҳ (0)