Ўзбекистон Ветеринария ва чорвачиликни ривожлантириш давлат қўмитаси қарорига мувофиқ қоракўлчилик субъектларига субсидия бериш тартиби белгиланди. Бу ҳақда Norma хабар берди.
Фото: Norma
Қайд этилишича, мазкур ҳужжат Ўзбекистон Президентининг 2019 йил 16 августдаги «Қоракўлчилик тармоғини комплекс ривожлантириш чора-тадбирлари тўғрисида»ги қарори ижросини таъминлаш мақсадида тасдиқланган.
Қабул қилинган низомда 2019—2023 йилларда қоракўлчилик субъектларига етиштирилган ва экспортга сотилган ҳар бирлик маҳсулот учун давлат бюджети маблағлари ҳисобидан субсидиялар ажратилиши назарда тутилган.
Субсидиялар қуйидаги миқдорларда ажратилади:
- қоракўл териси учун — 50 минг сўмдан;
- қоракўлча (вақтидан олдин туғилган қоракўлчалар териси) териси учун 75 минг сўмдан.
Низомга кўра, қоракўл терисини ўзида етиштирмасдан бошқа қоракўлчилик субъектларидан харид қилган ёки уларни экспортга йўналтирмаган қоракўлчилик субъектларига субсидия ажратилмайди.
Субсидия олиш учун Ветеринария ва чорвачиликни ривожлантириш давлат қўмитасига белгиланган шаклда ариза топширилади ва унга қуйидаги ҳужжатлар илова қилинади:
- туман статистика бўлими томонидан берилган мавжуд қоракўл қўйлар бош сони ва етиштирилган қоракўл ва қоракўлча тери сони тўғрисида маълумотнома;
- экспорт шартномаси ҳамда экспортга юборилган маҳсулотлар учун ҳисоб-фактура ҳужжатлари нусхалари;
- товар экспорт қилганлиги тўғрисида божхона юк декларацияси нусхаси.
Ветеринария ва чорвачиликни ривожлантириш давлат қўмитаси аризани келиб тушган санадан бошлаб 3 иш куни ичида кўриб чиқади ҳамда натижа ижобий бўлса, ариза берувчига тегишли хабарномани юборади. Бир вақтнинг ўзида Молия вазирлигига субсидия бериш тўғрисида буюртманома тақдим этилади, вазирлик 1 иш куни ичида буюртманомада кўрсатилган маблағларни Ветеринария ва чорвачиликни ривожлантириш давлат қўмитасининг махсус шахсий ғазна ҳисобварағига ўтказиб беради. Ушбу маблағлар яна 1 иш куни ичида қоракўлчилик субъектларининг тижорат банкларидаги ҳисобрақамига ўтказиб берилади.
Молиявий йил якунларига кўра, фойдаланилмаган, Ветеринария ва чорвачиликни ривожлантириш давлат қўмитасининг ҳисобрақамида қолиб кетган маблағлар давлат бюджетига қайтарилади.
Қоракўлчилик субъекти белгиланган шартларга мос келмаганда, шунингдек, сохта ёки нотўғри маълумотлар мавжуд ҳужжатлар тақдим этилганда субсидия ажратилиши рад этилади.
Субсидиялар ажратилиш жараёни Молия вазирлигининг Давлат молиявий назорати департаменти томонидан назорат қилинади.
