Хитойдан келган Ўзбекистон фуқаролари 14 кун муддатга тиббий назоратга олинмоқда

Санитар-эпидемиологик осойишталик агентлигининг маълум қилишича, 2 февраль соат 08:00 га қадар олинган расмий маълумотларга кўра, Хитойда жами 14 411 нафардан ортиқ фуқаро коронавирус билан касалланиб, 2110 нафар фуқаро оғир ҳолатда даволанмоқда, 304 нафар (2,1 фоиз) фуқаро ушбу касалликдан вафот этган.

Сўнгги маълумотларга кўра, дунёнинг Хитойдан ташқари 23 та давлатида (Австралия, Вьетнам, Германия, Канада, Корея, Камбоджа, Малайзия, Непал, Таиланд, Сингапур, АҚШ, Франция, Шри-Ланка, Япония, Филиппин, Ҳиндистон, Италия, Финляндия, БАА, Испания, Россия, Швеция ва Буюк Британия) 144 ҳолатда коронавирус инфекцияси лаборатория усулида тасдиқланган.

Республика Вирусология илмий текшириш институти клиникасига 15 январдан 2 февраль кунига қадар 84 нафар Ўзбекистон фуқароси ва 1 нафар япониялик фуқаро мурожаат қилган, уларнинг 12 нафарида тана ҳарорати кўтарилганлиги, бирламчи тиббий ёрдамга муҳтожлиги сабабли даволанишга ётқизилган, бугунги кунда 3 нафар бемор грипп ва ўткир респиратор инфекцияси билан даволанмоқда, уларда коронавирус инфекцияси аниқланмаган.

Соғлиқни сақлаш вазирлиги билан Ички ишлар вазирлиги ўртасида Хитойдан кириб келган фуқаролар тўғрисида кундалик ахборот алмашинуви йўлга қўйилган.

Ушбу фуқаролар тўғрисидаги рўйхат асосида ҳар бир соғлиқни сақлаш бошқармалари ва бирламчи тиббий бўғинлар орқали хонадонма-хонадон юриб, Хитойдан келган фуқаролар 14 кун муддатга тиббий назоратга олинмоқда. Ушбу тартиб асосида жорий йилнинг 1 февраль куни Андижон вилоятида Хитойга бориб келган фуқароларда олиб борилган тиббий кузатувлар давомида 2 нафар фуқарода тана ҳарорати кўтарилганлиги аниқланган. Ушбу беморларга зарурий муолажалар ўтказилган, беморларнинг умумий аҳволи қониқарли, тана ҳарорати меъёрида. Беморларда зудлик билан лаборатория таҳлиллари ўтказилган ва коронавирус инфекцияси аниқланмаган.

2 февраль кунига қадар агентлик қошида ташкил этилган штаб ишонч телефони орқали 1500 га яқин фуқародан келиб тушган саволларга жавоб берилган.

Ислом Каримов номидаги Тошкент халқаро аэропортига жорий йилнинг 1 февраль куни хорижий давлатлардан 32 та самолёт қабул қилинган, 4072 нафар фуқаро санитария-карантин пунктларида термометриядан ўтказилган, шулардан 20 нафари Хитойда ўқийдиган талабалар. Термометриядан ўтказилган фуқаролар орасида 2 нафар ўзбекистонлик ва 1 нафар Россия фуқаросида тана ҳарорати юқорилиги аниқланган, фуқароларнинг барчаси Республика Вирусология ИTИ клиникасига ётқизилган.

Темир йўллари АЖ марказий санитария-эпидемиология хизматига қарашли 6 та санитария-карантин пунктларидан жами 1006 нафар фуқаро ўтган, шулардан 132 нафарини хориж фуқаролари ташкил этади. Тана ҳарорати кўтарилган беморлар аниқланмаган.

Давлат чегара пости орқали кўплаб йўловчи ўтувчи санитария-карантин пунктлар Тошкент вилоятининг «Ғишткўприк», «Ойбек», Сурхондарёнинг «Айратон», «Гулбаҳор» ҳамда Андижон вилоятининг «Дўстлик» санитария-карантин пунктлари орқали 333 та автотранспортлар, 19 137 нафар фуқаролар ўтказилган, шулардан 6881 нафари чет эл фуқароси ҳисобланади. Тана ҳарорати кўтарилган фуқаролар аниқланмаган.

Хитойда коронавирус инфекцияси бўйича кузатилаётган мураккаб эпидемик вазият, бу касалликни республика ҳудудига кириб келиши ва тарқалиб кетишини олдини олиш борасида амалга оширилаётган профилактик тадбирлар Санитария-эпидемиологик осойишталиги агентлиги томонидан назоратга олинган.

Ташқи ишлар вазирлиги Хитойдаги ўзбекистонликларни эвакуация қилиш учун Пекиндан Тошкентга чартер рейслар 4 ва 5 февраль кунлари Пекин аэропортнинг 2-терминалидан амалга оширилишини маълум қилиб, Ўзбекистон фуқароларидан 3 февраль, душанба куни, Пекин шаҳридага элчихонага келишларини сўраган.

Шунингдек, вазирлик авиақатновлар бекор қилингани туфайли Пекин аэропортида қолиб кетган 3 нафар ўзбекистонлик талабага ёрдам кўрсатилишини маълум қилиб, талабалар билан алоқа ўрнатиб, муаммони ҳал қилиш бўйича дипломатлар тегишли чораларни кўраётганини эълон қилди.