Америка компаниялари билан ҳамкорлик қилиш ҳар қандай мамлакатга фойда келтиради. Бу ҳақда АҚШ давлат котиби Майк Помпео Қозоғистонга қилган ташрифи чоғида гапирди, деб ёзмоқда «Интерфакс».
Унинг сўзларига кўра, Қозоғистон савдо бўйича шерикларини эркин танлаш ҳуқуқига эга, лекин АҚШ билан ҳамкорлик қилиш кўплаб устунликлар беради. Сабаби Америка компаниялари ишчи ўринлари яратиш, шартномалар шаффофлиги, тенг мажбуриятлар ва иш сифатини кафолатлайди.
«Америка тизими шундай ишлайди», — дея қўшимча қилган Помпео.
АҚШ давлат котиби мисол тариқасида Tyson Foods компанияси билан ҳамкорликни алоҳида қайд этди, ушбу лойиҳани амалга ошириш Қозоғистонда қишлоқ хўжалиги соҳасини ривожлантиришга хизмат қилади.
«Бундан ташқари Chevron ва ExxonMobil к
аби АҚШнинг катта компаниялари нефть-газ соҳасига инвестиция киритиб, сизнинг келажагингиз учун хизмат қилади. Улар Қозоғистон фуқароларини ишга олиб, ўз маҳсулотингизни экспорт қилишингизга ёрдам беради», — деган АҚШ давлат котиби.
Аввал Помпео расмий ташриф билан Минскда бўлганди. Беларусь пойтахтида у санкциялар бекор қилиниши мумкинлиги ҳақида гапирган, шунингдек сўров юборилса мамлакатнинг нефть бўйича эҳтиёжларини қондиришни ваъда қилганди.
Қозоғистондаги ташриф якунлангач, Помпео Ўзбекистонга келади.