Хорижий давлатларда иш билан таъминлаш эвазига фуқароларнинг 35 минг АҚШ долларини қўлга киритган корхона раҳбарларига нисбатан жиноят иши очилди. Бу ҳақда «Дарё»га Бош прокуратура матбуот хизмати хабар берди.
Маълум бўлишича, «О. хусусий бандлик агентлиги» МЧЖ ходимлари М.И., Т.А. ва фуқаро И.Х. фуқаро Л.К. ва бошқаларнинг ишончига кириб, уларни алдаб, 4 нафар ўғли ва 1 нафар жиянини ноқонуний равишда, тегишли ҳужжатлар расмийлаштирмасдан Кореяга ишга юборишни ваъда қилган. Эвазига ҳар бири учун 7 минг АҚШ долларидан жами 35 минг АҚШ доллари талаб қилган.
Шундан 17 500 АҚШ долларини фирибгарлик йўли билан олган вақтида департамент томонидан ДХХ ходимлари билан ҳамкорликда ўтказилган тезкор тадбирда ашёвий далиллар билан ушланган.
Шунингдек, тезкор тадбир давомида, «А.visa» МЧЖ раҳбари Ш.А. юқоридаги 5 нафар фуқарони ноқонуний равишда Кореяга ишга юбориш эвазига аванс сифатида 2,5 минг АҚШ долларини олган вақтида ашёвий далиллар билан ушланган.
Ҳозирда, мазкур ҳолатлар юзасидан Жиноят кодексининг тегишли моддалари билан жиноят иши қўзғатилиб, тергов ҳаракатлари ўтказилмоқда.
Эслатиб ўтамиз, фуқароларни Кореяга ишга жўнатиш ҳуқуқига эга ягона ташкилот Ташқи меҳнат миграцияси агентлиги ҳисобланади, хусусий бандлик агентликларининг бунга ваколати йўқ.
Изоҳ (0)