Шавкат Мирзиёев 31 январь куни Тошкентнинг Олимлар кўчасидаги илмий-тадқиқот институтларига ташриф буюрди, деб хабар бермоқда Президент матбуот хизмати.
Ўзбекистонда 2020 йил Илм, маърифат ва рақамли иқтисодиётни ривожлантириш йили деб эълон қилинган эди. Президент Олий Мажлисга Мурожаатномасида шу борадаги мақсадларга тўхталар экан, ҳар йили илм-фаннинг бир нечта устувор йўналишини ривожлантириш зарурлигини таъкидлаган. 2020 йилда математика, кимё, биология, геологияда фундаментал ва амалий тадқиқотлар фаоллаштирилиб, олимларга барча шарт-шароитлар яратилиши белгиланди.
Қайд этилишича, Ўзбекистон табиий ресурсларга бой бўлиб, уларни тадқиқ қилиб, самарали ўзлаштириш учун геология бирламчи асос. Шу сабабли Президент бу соҳани алоҳида назоратига олиб, унинг ривожлантириш асосларини янгидан ташкил этиб бермоқда.
Бугунги кунда ер қаърини геологик ўрганиш бўйича илмий-тадқиқот ишлари Давлат геология ва минерал ресурслар қўмитаси тизимидаги 4 та муассаса – Геология ва геофизика институти, Гидрогеология ва инженерлик геологияси институти, Минерал ресурслар институти, Нефть ва газ конлари геологияси ҳамда қидируви институти томонидан олиб борилади.
Давлат раҳбари ташаббуси билан мазкур институтлар негизида яхлит мажмуа – замонавий университет ташкил этилиши режалаштирилган. Шавкат Мирзиёев 31 январь куни ушбу янги университет кампусига тамал тоши қўйди.
Таъкидланишича, мазкур муассаса таълим ва илм-фан кластери шаклида бўлади. 4 та институтнинг моддий-техник базаси ва илмий кадрлар салоҳияти бирлаштирилиб, энг илғор ускуналар билан жиҳозланади. Санкт-Петербург тоғ-кон университети ва бошқа нуфузли даргоҳлар билан ҳамкорликда таълим дастури йўлга қўйилади.
Изоҳ (0)