Президент Шавкат Мирзиёев 28 январь, сешанба куни транспорт тизимини самарали ташкил этиш борасидаги устувор вазифалар муҳокамасига бағишланган йиғилиш ўтказди.
Давлат раҳбари матбуот хизмати ахборотида таъкидланишича, ҳозирги кунда Ўзбекистоннинг транспорт-транзит салоҳиятидан тўлиқ фойдаланилмаяпти. Оптимал тариф сиёсати мавжуд бўлмагани сабабли транзит юк оқимини жалб этиш ва маҳаллий товарларнинг ташқи бозорларда рақобатбардошлигини ошириш имконияти чекланмоқда.
«Йиғилишда транзит сиёсатини бутунлай қайта кўриб чиқиш Транспорт вазирлигининг энг муҳим вазифаларидан бири экани таъкидланди», — дейилади расмий ахборотда. Темирйўл тизимини тубдан ислоҳ қилиш, соҳага хусусий капитални кенг жалб этиш бўйича кўрсатмалар берилган.
Халқаро экспертларнинг хулосасига кўра, Ўзбекистон транзит салоҳиятини ҳозирги 7 миллион тоннадан 16 миллион тоннага, 2030 йилда эса, минтақавий лойиҳаларни амалга ошириш эвазига 23 миллион тоннага етказиш имконияти мавжуд. Қайд этиш жоиз, Жаҳон банкининг логистика рейтингида Ўзбекистон 163 та давлат орасида 99-ўринда бўлиб, халқаро ташувларни амалга оширишнинг соддалиги бўйича 120-ўринда қайд этилган.
Изоҳ (0)