Истанбулда 27 январь, душанба куни ўзбекистонлик Абдулқодир Машарипов иши бўйича бўлиб ўтган суд мажлисида прокурор унга 40 та умрбод озодликдан маҳрум этиш жазоси берилишини сўради, деб хабар бермоқда Anadolu Agency.
Абдулқодир Машарипов 2017 йилда Истанбулдаги тунги клубда теракт содир этганганликда айбланмоқда. Агар у айбдор деб топилса, қуролли террорчилик гуруҳига аъзо бўлгани учун 15 йилга, теракт вақтида 39 кишини ўлдиргани учун 2 370 йилга озодликдан маҳрум этилиши мумкин.
Қайд этилишича, айблов хулосасида 58 нафар гумондор тилга олинган бўлиб, уларнинг 18 нафари ҳибсда, қолган 8 нафарини жиноятда иштирок этганликлари ёки айбларининг қисман асосланганлиги тўғрисида далиллар йўқлиги сабабли прокурор уларни оқлашни сўраган.
Эслатиб ўтамиз, 2017 йил 1 январга ўтар кечаси «Калашников» автомати билан қуролланган террорчи Истанбулдаги Reina тунги клубига бостириб кириб, одамларга қарата ўт очган эди. Бинода 700 дан ортиқ киши бўлган. Туркия полицияси хабарига кўра, терактда 39 киши қурбон бўлган, 69 киши жароҳатланган.
Изоҳ (0)