Ўзбекистон коронавирус туфайли хитойлик сайёҳларнинг бир қисмини йўқотиши мумкин

Хитой ҳукумати мамлакат ташқарисида меҳмонхоналар брон қилиш ва турларда иштирок этишни тақиқлаш орқали коронавирус тарқалишини чеклашга уринмоқда, деб хабар берди Spot The New York Times’га асосланиб.

Шунингдек, пойтахтда эпидемия тарқалишининг олдини олиш мақсадида Пекин ва бошқа провинциялар ўртасида автобус қатновлари қисқартирилган.

Шу билан бирга, йўлланмалар бўйича хорижий мамлакатларда бўлиб турган Хитой фуқароларига уларнинг муддатини узайтиришга рухсат берилган.

«Forbes.kz» вирус туфайли туризм саноати зарар кўриши мумкинлиги ҳақида ёзмоқда.

Бунда гап алоҳида мамлакат ҳақида эмас, бутун дунё ҳақида кетмоқда. Зарар ялпи ички маҳсулотининг қарийб 11 фоизини туризм ташкил қиладиган Хитойдан тортиб, хитойликлар ўртасида оммабоп ҳисобланувчи Жануби-Шарқий Осиё, Европа мамлакатлари ва АҚШгача тааллуқли.

2018 йилда хитойлик сайёҳлар 149 миллионта саёҳатни амалга ошириб, бунинг учун хорижий мамлакатларда 130 миллиард доллар сарфлаган.

Бу маблағларнинг аксарият қисми Янги йил таътиллари чоғида сарфланган.

Давстатқўм маълумотларига кўра, 2019 йилда Хитой Ўзбекистонга фуқаролари энг кўп ташриф буюрган давлатлар бешталигига кирган.

Ўтган йилда Ўзбекистонга 61,9 минг нафар хитойлик келган. 2019 йилда Ўзбекистонга саёҳатга келган хорижликларнинг умумий сони 8,2 миллион кишини ташкил этган.

Экспертларнинг фикрича, хавотирланиш учун асос унчалик катта эмас— Жаҳон соғлиқни сақлаш ташкилоти Ухандаги коронавирус эпидемиясини минтақавий фавқулодда ҳолат деб ҳисоблашдан бош тортган.

Хитой ҳукуматининг радикал ҳаракатлари эса вирус кўлами кенгайиб кетишининг олдини олишга қаратилган.

Хитой олимларининг фикрига кўра, эпидемия март, узоғи билан майга қадар давом этади.

Аввалроқ Хитойда коронавирусдан вафот этганлар сони 106 кишига етгани хабар берилди. Жаҳон соғлиқни сақлаш ташкилоти (ЖССТ) коронавируснинг глобал хавфини баҳолаш билан боғлиқ ҳужжатларда хатога йўл қўйилганини ва у қайд этилганидек ўртача эмас, юқори эканини тан олди.

Германияда коронавирус билан касалланишга оид илк ҳолат тасдиқланди. ТИВ Ухандан Ўзбекистонга қайтган талабаларга зудликда ССВ билан боғланишни тавсия қилди.