Ўзбекистон бош вазири ўринбосари — молия вазири Жамшид Қўчқоровнинг маълум қилишича, Президентнинг парламентга мурожаатидаги бандларни амалга ошириш давлат бюджети учун катта юк бўлмайди. Бу ҳақда у Халқаро пресс-клубнинг йиғилишида маълум қилди, деб ёзмоқда «Gazeta.uz».
Президент Шавкат Мирзиёев олий таълим қамровини ошириш фақат тўлов-шартнома асосида амалга оширилмаслиги кераклигини қайд этди. Давлат раҳбари ОТМларга киришда давлат грантлари миқдорини икки баробарга оширишни таклиф қилди. Бундан ташқари, Президент қизлар учун алоҳида грантлар ажратиш кераклигини маълум қилди.
Мавзуга доир: Шавкат Мирзиёев: ОТМларда давлат грантлари икки баробар кўпайтирилади, қизлар учун алоҳида грант ўринлари ажратилади
Молия вазирининг таъкидлашича, грантлар ажратиш бюджет учун унчалик катта харажат бўлмайди.
Жамшид Қўчқоровнинг айтишича, грантлар, албатта, пул талаб қилади. Бу 2020 йилда давлат бюджетига кўп харажатлар келтирмайди. Бу босқичма-босқич бажарилади. Дастлаб, Олий таълим вазирлиги STEM (фан, технология, муҳандислик ва математика) йўналиши учун тақсимлашни амалга ошириши керак. Лекин агар бир йил олинадиган бўлса, унда 500 миллиард сўм ҳақида гап боради. Бу эса давлат бюджети учун катта масала ҳисобланмайди.
Шу билан бирга, Жамшид Қўчқоров Президент топшириғига биноан ишлаб чиқиладиган Камбағалликни камайтириш дастури катта бюджет маблағларини талаб қилиши мумкинлигини таъкидлади. Шавкат Мирзиёев Ўзбекистон ҳудудлари, айниқса, қишлоқлар аҳолисининг аксарияти етарли даромад манбаларига эга эмаслигини таъкидлади. Турли маълумотларга кўра, аҳолининг кам таъминланган қатламлари кўрсаткичи 12—15 фоизни ёки 4—5 миллион кишини ташкил этади.
«Кўпчилик бу муаммони нафақа ва моддий ёрдам ёки уларнинг ҳажмини кўпайтириш орқали ҳал қилиш мумкин деб ҳисоблайди. Бироқ, бу муаммони тубдан ҳал қилмайдиган бир томонлама ёндашув. Қашшоқликни камайтириш комплекс иқтисодий ва ижтимоий сиёсатни амалга оширишни талаб қилади — тадбиркорлик фаолиятини рағбатлантиришдан аҳолининг имкониятлари ва салоҳиятини жалб қилиш, янги иш ўринлари яратишгача», — деб таъкидлаган эди Президент.Молия вазири нафақалар қашшоқликка қарши курашнинг иккиламчи йўналиши эканлиги ҳақидаги фикрга қўшилади.
Молия вазири ўринбосари Шоҳрух Шораҳмедов Сирдарё вилоятидаги кам таъминланган оилаларга нафақа тайинлаш ва тўлаш бўйича тажриба ҳақида гапирди. Ёрдам «Ижтимоий ҳимоя ягона реестри» ахборот тизими орқали белгиланади.
Унинг қайд этишича, тажриба шуни кўрсатадики, Сирдарё вилоятида мурожаат қилганларнинг 80 фоизи «етарли даромад» сабабли нафақадан маҳрум бўлган. Оилада бир кишининг Captiva, Malibu ва Nexia автомашиналари борлиги аниқланган. Шундай киши моддий ёрдам сўраб мурожаат қилган, тизим компьютери эса буни аниқлаган ва моддий ёрдам беришни рад этган.
Молия вазирининг айтишича, тасдиқланган давлат бюджетида ҳудудларни ижтимоий-иқтисодий ривожлантириш билан боғлиқ тадбирларни ўтказиш учун 1,3 триллион сўм маблағ ажратилган. Белгиланган вазифаларни бажариш учун ушбу маблағлардан фойдаланиш мумкин. Бундан ташқари, Вазирлар Маҳкамасининг захира жамғармаси ҳам мавжуд бўлиб, ундан ҳам фойдаланиш мумкин.
Изоҳ (0)