Уй-жой қурилишига хусусий секторни фаол жалб қилмасдан туриб, аҳолининг уй-жойга бўлган талабини тўлиқ таъминлаш мумкин эмас. Бу ҳақда Ўзбекистон Президенти Шавкат Мирзиёев 24 январь куни Олий Мажлис палаталарига йўллаган Мурожаатномасида айтиб ўтди.
Шу сабабли, Президентнинг таъкидлашича, янги ипотека тизими жорий этилмоқда. Бу борада вилоятлардаги шаҳарлар ва Тошкент шаҳрида 18 мингга яқин ҳамда қишлоқларда 4 мингта уй-жой хусусий сектор томонидан қурилади. Давлат, банклар ўртасида соғлом рақобатни таъминлаш мақсадида, уларга қарийб 4 триллион сўм маблағларни аукционлар орқали ажратади.
Мавзуга доир: Ўзбекистонда сўнгги тўрт йилда қанча уй қурилди ва аҳоли эҳтиёжини тўла қондириш учун яна қанча қуриш керак?
Қайд этилишича, кам таъминланган аҳолини қўллаб-қувватлаш мақсадида шаҳарларда 16 минг оилага уй-жой олишга бошланғич бадал ва кредит фоизини қоплашга бюджетдан 1 триллион сўм субсидия ажратилади.
«Юрагимдаги бир ниятимни сизларга айтмоқчиман. Ҳаммамиз ҳам ўз вақтида уй олиш, пропискага ўтиш бўйича муаммоларга дуч келганмиз, 50—60 ёшдаги ўрта ёш вакилларини, айниқса, Тошкентга ёки катта шаҳарларга келиб ишлайман деганларни ҳаётида энг қийнаган нарса — уй ва прописка эди. Менинг энг катта ниятим шуки, Ватанимиз ичра ҳар бир инсон, ўзининг ‘кичик ватаниъга – уй-жойига эга бўлса, биздан халқимиз ҳам, Яратган ҳам рози бўлади», — дея қўшимча қилди Шавкат Мирзиёев.
Изоҳ (0)