Қорақалпоғистон Республикаси Элликқалъа туманини мазкур ҳудуддаги туризм марказига айлантириш режалаштирилмоқда. Бу ҳақда Туризмни ривожлантириш давлат қўмитаси хабар берди.
Маълум қилинишича, Элликқалъа тумани Бўстон шаҳрида «Элликқалъа — туризм маркази» халқаро илмий-иқтисодий, маданий-маърифий конференция бўлиб ўтмоқда. Форумнинг асосий мақсади Элликқалъа туманини янги туризм марказига айлантиришга йўналтирилган.
Тадбир Ўзбекистон Республикаси Туризмни ривожлантириш давлат қўмитаси, Қорақалпоғистон Республикаси Вазирлар Кенгаши, Маданият вазирлиги, Ташқи ишлар вазирлиги, Элликқалъа тумани ҳокимлиги ҳамда «Ҳамкор Стимул Сервис» инновацион лойиҳалар илмий-тадқиқот маркази ҳамкорлигида ўтказилмоқда.
Анжуман давомида иштирокчи ва меҳмонларга Қорақалпоғистон Республикаси Элликқалъа тумани ҳудудида жойлашган қадимий Хоразм қалъалари ҳақида маълумотлар берилди.
Етакчи археолог Г.Хўжаниёзов томонидан ҳудуддаги тарихий ёдгорликлар, уларнинг номлари ва ўзига хос хусусиятлари, собиқ Қават қалъа воҳасига оид тақдимот намойиш этилиб, уларнинг ҳали тўлалигича ўрганилмагани таъкидланди.
Г.Хўжаниёзов қорақалпоғистонлик археологларнинг 20 йилдан зиёд Сидней университети билан ҳамкорлик қилаётганини қайд этиб, ҳар бир тарихий объектнинг муҳофаза қилинувчи зонасини белгилаб олишни таклиф қилди.
Шунингдек, тадбир давомида Элликқалъа тумани ҳокими С.Авезов ҳам сўзга чиқиб, саноат туризм ва қишлоқ хўжалиги ҳисобига ривожланаётганини таъкидлади.
«2019 йилда Элликқалъа туманига ташриф буюрган хорижий сайёҳлар сони 50 мингдан ошди. Биз бу кўрсаткичларда тўхтаб қолмай, бундан-да юқори натижаларни қайд этиш йўлида ишлаяпмиз», — деди у.
Изоҳ (0)