Самарқандда автомобиль ойнасини «қорайтириш»га рухсат берувчи рухсатномани сохталаштирган фуқаро аниқланди, деб хабар беради вилояти ИИБ ахборот хизмати.
Самарқанд вилояти ИИБ ЙҲХБ томонидан 2019 йил 29 декабрь куни соат 15:30 ларда Самарқанд шаҳар Рудакий кўчасида хизмат олиб бораётган ЙПХ инспектори, Lacetti русумли автомобилни тўхтатган.
Автотранспорт воситасининг ҳужжатлари кўздан кечирилганда, унинг ойналарининг тусини ўзгартиришга рухсат берувчи АА серияли 0048310 рақамли рухсатнома инспекторда шубҳа уйғотган.
Олиб борилган дастлабки суриштирув жараёнида АА серияли 0048310 рақамли рухсатнома Nexia-3 автомашинага берилган бўлиб, Lacetti ҳайдовчиси ушбу рухсатномани нусха кўчириш йўли билан сохталаштирганлигига иқрор бўлган.
Ҳайдовчининг ҳаракатларида Жиноят кодексининг 228-моддасида («Ҳужжатлар, штамплар, муҳрлар, бланкалар тайёрлаш, уларни қалбакилаштириш, сотиш ёки улардан фойдаланиш») кўрсатилган жиноят аломатлари мавжудлиги сабабли унга нисбатан тўпланган ҳужжатлар қонуний қарор қабул қилишлик учун Самарқанд шаҳри бўйича ИИО ФМБ тергов бўлимига юборилган бўлиб, ҳолат юзасидан дастлабки тергов ҳаракатлари олиб борилмоқда.
Эслатиб ўтамиз, транспорт воситалари ҳайдовчилари ва йўловчилар, шу жумладан, республика ҳудудига ташриф буюрадиган туристлар учун қулай шарт-шароитлар яратиш мақсадида Вазирлар Маҳкамасининг 2018 йил 18 июлда «Туси ўзгартирилган (қорайтирилган) ойнали енгил автотранспорт воситаларидан фойдаланишни тартибга солиш чора-тадбирлари тўғрисида»ги қарорига мувофиқ енгил автомобилларнинг орқа, ён ойналари тусининг ёруғлик ўтказувчанлиги чекланмаган даражада, олд ён ойналарининг ёруғлик ўтказувчанлиги 50 фоиздан кам бўлмаган даражада қорайтириш белгиланган.
Изоҳ (0)