Хитойнинг Ухань шаҳрида 3-14 февраль кунлари Осиё-Океания минтақалари учун бокс бўйича Токио Олимпиадасига йўлланма берувчи мусобақа ўтиши белгиланган эди.
Бироқ ушбу ҳудудда ҳаёт учун хавфли коронавируснинг тарқалиши сабаб лицензион турнир бекор қилинди, дея хабар қилмоқда Ўзбекистон Миллий Олимпия қўмитаси.
Халқаро Олимпия қўмитаси шафелигида ўтадиган лицензион мусобақа қачон ва қаерга кўчирилиши борасида янгилик яқин кунлар ичида эълон қилинади.
Эслатиб ўтамиз, аввалроқ Ўзбекистон бокс терма жамоаси мусобақа тайёргарликнинг сўнгги босқичини ўташ учун Хитойга йўл олганди. Айни вақтда ўзбекистонлик боксчилар Уишан шаҳрида ўқув-машғулот йиғинини ўтказмоқда.
Ўзбекистон ТИВ Хитойда тарқалган вирус туфайли у ерга бормоқчи бўлган ўзбекистонликлар ва у ерда бўлиб турган фуқароларни эҳтиёткорликка чақирган. Ўзбекистон ССВ эса Хитойда тарқалган коронавирус туфайли чегарадаги санитар назоратни кучайтирганди. Хитой ҳукумати янги вирус ўчоғи ҳисобланган Ухань шаҳридан аҳолининг чиқишини тақиқлаб қўйди.
Янада кўпроқ футбол ва спорт янгиликларидан бохабар бўлишни истасангиз, «Дарё»нинг Telegram’даги расмий спорт канали — @daryo_sport’га обуна бўлинг!
Изоҳ (0)