Xitoyning Uxan shahrida 3-14 fevral kunlari Osiyo-Okeaniya mintaqalari uchun boks bo‘yicha Tokio Olimpiadasiga yo‘llanma beruvchi musobaqa o‘tishi belgilangan edi.
Biroq ushbu hududda hayot uchun xavfli koronavirusning tarqalishi sabab litsenzion turnir bekor qilindi, deya xabar qilmoqda O‘zbekiston Milliy Olimpiya qo‘mitasi.
Xalqaro Olimpiya qo‘mitasi shafeligida o‘tadigan litsenzion musobaqa qachon va qayerga ko‘chirilishi borasida yangilik yaqin kunlar ichida e’lon qilinadi.
Eslatib o‘tamiz, avvalroq O‘zbekiston boks terma jamoasi musobaqa tayyorgarlikning so‘nggi bosqichini o‘tash uchun Xitoyga yo‘l olgandi. Ayni vaqtda o‘zbekistonlik bokschilar Uishan shahrida o‘quv-mashg‘ulot yig‘inini o‘tkazmoqda.
O‘zbekiston TIV Xitoyda tarqalgan virus tufayli u yerga bormoqchi bo‘lgan o‘zbekistonliklar va u yerda bo‘lib turgan fuqarolarni ehtiyotkorlikka chaqirgan. O‘zbekiston SSV esa Xitoyda tarqalgan koronavirus tufayli chegaradagi sanitar nazoratni kuchaytirgandi. Xitoy hukumati yangi virus o‘chog‘i hisoblangan Uxan shahridan aholining chiqishini taqiqlab qo‘ydi.
Yanada ko‘proq futbol va sport yangiliklaridan boxabar bo‘lishni istasangiz, “Daryo”ning Telegram’dagi rasmiy sport kanali — @daryo_sport’ga obuna bo‘ling!
Izoh (0)