Бектемир туман ҳокимлигида Тошкент шаҳар ИИББ бошлиғи ўринбосари, туман ҳокими ўринбосари, туман прокурори, солиқ ва санитар-эпидемиология идоралари вакиллари ҳамда «Қўйлиқ» деҳқон бозорининг масъул ходимлари иштирокида йиғилиш бўлиб ўтди, деб хабар беради ИИББ матбуот хизмати.
Йиғилиш давомида бозор ва унинг атрофидаги вазиятни яхшилаш учун қўллаш керак бўлган зарурий чора-тадбирлар муҳокама қилинди. Биринчи навбатда санитария талаблари, автотранспорт воситалари учун тураргоҳлар, хизмат кўрсатиш даражаси, савдо қилиш учун шароитлар яратиш масаласига эътибор қаратилди.
Шунингдек, «Қўйлиқ» бозори ҳудудида тартиб ўрнатиш ва хавфсизликни ошириш учун товарларни олиб кириш ва олиб чиқишни қайд қилувчи, юк ташувчилар ишини кузатадиган диспетчерлик хизматини йўлга қўйиш таклиф этилди.
Бундан ташқари қуйидаги таклифлар ҳам билдирилди:
- бозор ишчилари учун махсус форма жорий этиш;
- сотиш учун мўлжалланган пичоқларни қатъий равишда қулфли шиша витрина остида махсус сақлаш;
- маҳаллий жамоат овқатланиш масканлари ва дорихоналарда алкогол ва бошқа спиртли маҳсулотлар савдоси назоратини кучайтириш, бозор ва унинг атрофида қуйма алкогол маҳсулотларининг сотилишини тақиқлаш;
- бозорда ўзини тутиш қоидалари ҳақида махсус буклетлар тайёрлаш ва тарқатиш, шунингдек, бозорга плакатлар ўрнатиш;
- жамоат тартибини ва фуқароларнинг хавфсизлигини таъминлаш учун чақирув тугмаларини ўрнатиш.
Изоҳ (0)