Навоий вилоятида 600 млн долларлик шамол электр станцияси қурилади

18 январь куни Инвестиция ва ташқи савдо вазирлигида Masdar компанияси билан Навоий вилоятида 400 МВт қувватга эга шамол электр станциясини қуриш лойиҳасини амалга ошириш тўғрисида келишув имзоланди. Бу ҳақда вазирлик матбуот хизмати хабар берди.

Ушбу келишувга мувофиқ Masdar компанияси шамол электр станциясини лойиҳалаштириш, молиялаштириш, қуриш ва эксплуатация қилишни амалга оширади. Қурилиш учун инвестициялар ҳажми 600 миллион доллар миқдорида баҳоланмоқда; ишларни 2020 йилнинг учинчи чорагида бошлаб, объектни 2022 йилда фойдаланишга топшириш режа қилинмоқда.

Шунингдек, Mubadala компанияси билан «Таллимаржон ИЭС» ОАЖ базасида мавжуд энергоблокларни хусусийлаштириш ва янгиларини қуриш лойиҳасини амалга ошириш тўғрисида келишув имзоланди. Келишув Таллимаржон энергетика комплексини хусусийлаштириш, ривожлантириш, молиялаштириш ва эксплуатация қилишнинг механизмлари ва шартларини белгилайди. Амирлик томонидан объектнинг акцияларини сотиб олиш ва хусусийлаштириш жараёни 2020 йилнинг учинчи чорагида режа қилинган.

Таъкидлаш жоизки, ушбу келишувлардан олдин ўтган йилнинг ноябрь ойида Masdar компанияси билан Навоий вилоятида умумий қуввати 100 МВт бўлган фотоэлектр станциясини қуриш бўйича инвестиция келишуви имзоланган, чунки октябрь ойида Masdar компанияси давлат-хусусий шериклик (ДXШ) асосида муқобил энергетика соҳасига инвестицияларни жалб қилиш бўйича Ўзбекистон тарихида биринчи очиқ тендер ғолиби деб эълон қилинган эди.

Ўзбекистон ҳукумати ҳамда Masdar ва Mubadala компаниялари ўртасида республикада электр станциялари қуриш борасида ҳамкорлик қилиш бўйича келишув 2019 йил март ойида Ўзбекистон Президентининг Бирлашган Араб Амирликларига расмий ташрифи доирасида имзоланган.

Masdar Mubadala инвестиция холдингининг шўба компанияси бўлиб, дунёда қайта тикланувчи энергия манбаларини ривожлантириш бўйича етакчи халқаро компаниялардан бири.