Қашқадарёда фарзанди, келини ёки набирасини тиббий маълумотли қилишни ният қилган ота-оналар тиббиёт коллежларида 2019/2020-ўқув йили учун қабул жараёни кечикаётганидан ташвишланмоқда. «Дарё»га мурожаат қилган қашқадарёликлар қабул кечикаётганининг сабабини билолмай сарсонлигини билдирди.
— Қизим юридик маълумотга эга, аммо куёвим мазкур соҳада ишлатмаётгани сабаб тиббий маълумот олиб, ҳамшира бўлиб ишласа ҳам майли деган тўхтамга келгандик. Аксига олиб вилоятимиздаги тиббиёт коллежларида қабул бошланмаяпти, - дейди Ҳабиба Сайфуллаева. – Коллежга қатнашдан чарчадик. Масъуллардан сўраймиз, улар ҳам аниқ гап айтишмайди.
Косон туманида яшовчи Ойиша Қувондиқованинг айтишича, у 2016 йил академик лицейнинг табиий фанлар йўналишини тамомлаган бўлиб, институтга топширган. Аммо киролмаган. Энди эса тиббиёт коллежига ўқишга кириб, ўрта-махсус маълумотли тиббиёт ходими бўлиш ниятида.
— Ўтган ўқув йилида келганимда қабул тугаган эди, энди эса бошланмаётгани мени ташвишлантирмоқда. Тиббиёт коллежида ўқиб бўлса-да, тиббий маълумотнома олмоқчиман, - дейди Ойиша Қувондиқова. – Лекин қабул бошланмаяпти. Кутишдан чарчадик.
«Дарё» мухбири билан суҳбатлашганларнинг айтишича, мазкур муаммо билан Соғлиқни сақлаш вазирлиги-ю, Президент порталигача мурожаат қилинган. Лекин тайинли жавоб берилмаган.
— Қабул бошланмаётганининг сабабини билиш мақсадида Соғлиқни сақлаш вазирлигига ҳам мурожаат қилдик, Президент порталига ёздик. Аммо тайинли жавоб беришмади, — дейди Ойиша Қувондиқова. – Ҳатто Қарши шаҳар ҳокимлигига ҳам мурожаат қилгандик. Улар бу бизнинг вазифамизга кирмайди, вазирликка мурожаат қилинг дейишган.
Косон туманида яшовчи яна бир мурожаатчи Дилноза Хушвақтованинг маълум қилишича, у ўзи яшовчи ҳудудда қўни-қўшнилардан ёрдам сўраганларини «укол» қилиб туради. Бу борада тажрибаси ҳам бор. Аммо диплом йўқ.
— Қўни-қўшниларни «укол» қилиб қўйиш тажрибасига эгаман, аммо дипломим йўқ. Рухсатномам йўқ. Менга диплом керак. Шунинг учун ҳам тиббиёт коллежида қабул бошланишини интизорлик билан кутяпман.
— Келиним спортчи. Спорт коллежини тамомлаган. Шунинг учун ҳам биз унинг бу соҳада ишлашини хоҳламаяпмиз, тиббиёт коллежида ўқиб, оиламизга ҳамширалик қилса ҳам майли, - дейди Нуриддин Хўжамов. – Ўқиш бошланмаяпти.
Қарши туманида яшовчи Жума Файзиев ҳам оиласи учун тиббий маълумотга эга оилавий ҳамширага эҳтиёж сезаётганлигини айтар экан, ўзи яшовчи ҳудудда 34 та хонадонга хизмат кўрсатувчи тиббиёт ходими йўқлигидан шикоят қилди.
— Набирам ўқиса, ҳеч бўлмаса оиламизга ёрдам бериб турарди-да, биз яшаётган маҳаллада 34 та хонадонга хизмат кўрсатувчи ҳамширалар йўқ, - дейди Жума Файзиев. – Бирор жойга мурожаат қилсанг, шу ёшга кирганда мурожаат қилибдими деб кулишмасин деб, қабул бўлишини кутиб юрибмиз. Аммо қабул бўлармикин?
Мурожаатчи Дилмурод Элмуродовнинг айтишича, қизи 3 йилдан бери тиббиёт коллежига киролмай сарсон.
— Сал олдинроқ келсангиз, ҳали қабул бошлангани йўқ дейишади, сал кечроқ келсангиз, қабул тугади дейишади. Хуллас, шу аҳволда. Қизим 3 йилдан бери тиббиёт коллежига киролмайди. Бу йил эса аксига олиб, қабул ҳам бўлмаяпти.
«Дарё» мухбири билан суҳбат қилганларнинг маълумот беришича, тиббиёт коллежи раҳбарияти одатда қабул бошлангани ҳақида маълумот бермайди. Қабул ими-жимида ўтиб кетади.
Дилбар Холиқова ҳамда Моҳигул Нормуродоваларнинг айтишича, ўрта-махсус маълумот олиб бўлса-да, ишлаш нияти бор. Оиласига моддий кўмак зарур.
— 2019/2020-ўқув йили учун нафақат тиббиёт коллежларида, бошқа коллежларда ҳам ҳали қабул бўлмади, - дейди Ўрта-махсус касб-ҳунар таълими Қашқадарё ҳудудий бошқармаси бошлиғи Камол Янгибоев. – Ота-оналар кўп келишяпти. Аммо ҳали тайинли гап йўқ.
Маълумот берилишича, вилоятда 4 та тиббиёт коллежи мавжуд бўлса, республика миқёсида бу кўрсаткич 78 тани ташкил этади. Бироқ, айни кунга қадар бирорта ҳам ўқув муассасаси 2019-2020 йил учун ўқувчи қабул қилмаган. Хўш, нега?
Изоҳ (0)