Жаҳон банки Ўзбекистон иқтисодиётининг энг юқори ўсишга эришишини тахмин қилди

Жаҳон банки Ўзбекистон иқтисодиёти 2020 йилда 5,7 фоизга ўсишини прогноз қилди. Бу ҳақда ташкилотнинг «Жаҳон иқтисодиёти, 2020 йил январь: суст тараққиёт, сиёсий чақириқлар» ҳисоботида қайд этилган, деб ёзмоқда «Spot».

Бу Шарқий Европа ва Марказий Осиё мамлакатлари орасидаги энг юқори кўрсаткич. Иккинчи ўринда Тожикистон (5,5 фоиз), учинчида — Туркманистон (5,2 фоиз), тўртинчи ўринда — Арманистон (5,1 фоиз), бешинчи ўринда — Грузия (4,3 фоиз).

2021 ва 2022 йилларда Ўзбекистон иқтисодиётининг ўсиш кўрсаткичи 6 фоизни ташкил этади. Бу ҳам юқоридаги мамлакатлар орасидаги энг юқори натижа ҳисобланади.

Минтақа иқтисодиётининг тараққиётига геосиёсий турғунлик, сиёсатнинг ноаниқлиги, шунингдек ташқи таъсирлар яъни Евроиттифоқ ҳамда Хитойнинг темпни пасайтиришга уриниши тўсқинлик қилиши мумкин.

2019 йилда Жаҳон банки Ўзбекистон иқтисодиётининг 5,5 фоизга ўсишини прогноз қилган ва якунда шундай бўлиб чиққан.