Тошкент шаҳар ИИББ 9 январь куни Тошкентнинг Бунёдкор ва Фурқат кўчалари чорраҳаси яқинида BMW ва Lacetti автомобиллари иштирокида юз берган йўл-транспорт ҳодисаси ҳақида расмий ахборот берди.
9 январь куни соат 23:30 да Чилонзор тумани Бунёдкор кўчасида жойлашган Халқлар дўстлиги саройи қаршисида иккита автомобиль иштирокида йўл-транспорт ҳодисаси рўй берди.
Lacetti русумли автомобиль ҳайдовчиси 44 ёшли Д. М. Ислом Каримов кўчасига бурилишдан олдин светофоргача бир неча метр масофа қолганида тор жойда тўхтаган. Тезликни ошириб ҳаракатланиб келаётган давлат рақами 01 Т 777 ЕВ бўлган BMW автомобили Lacettiга тўқнашиши оқибатида автомобилларда ёнғин келиб чиққан.
Lacetti русумли автомобиль ҳайдовчиси ва 6 ёшли йўловчиси Д.М. Тошкент шаҳар ИИББ ЙПХ ва Миллий гвардия ходимлари томонидан қутқарилгач, жароҳат ва куйишлар билан шифохонага етказилган. Яна икки нафар йўловчилар – 44 ёшли I.М. ва 8 ёшли Я.М. воқеа жойида ҳаётдан кўз юмди.
BMW автомобили ҳайдовчиси воқеа жойидан яширинди. ЙТҲ содир бўлганида автомобилни бошқарган ҳайдовчининг шахсини аниқлаш бўйича чоралар кўрилмоқда.
ЙТҲ BMW автомобили ҳайдовчиси тезликни кескин оширгани туфайли юз бергани тахмин қилинмоқда.
ЙТҲ факти бўйича Чилонзор тумани ИИО ФМБ ҳузуридаги тергов бўлими томонидан Ўзбекистон Республикаси Жиноят кодексининг 266-моддаси (Транспорт воситалари ҳаракати ёки улардан фойдаланиш хавфсизлиги қоидаларини бузиш) «а» банди 3-қисми билан жиноий иш қўзғатилди.
Марҳумларнинг яқинларига чуқур таъзия изҳор этамиз, дейилади хабарда.
Изоҳ (0)