Жиззах вилояти Ғаллаорол туманида 9 январь куни ис газидан заҳарланиш оқибатида 4 кишидан иборат оиланинг барча аъзоси вафот этди. Бу ҳақда Соғлиқни сақлаш вазирлиги хабар берди.
Маълум қилинишича, бугун, 9 январь куни соат 14:04 атрофида Ғаллаорол туман тиббиёт бирлашмаси тез тиббий ёрдам бўлимига тумандаги Кўкгумбаз МФЙга қарашли Қоронғул қишлоғида яшовчи, 1987 йилда туғилган Д.Ш. хонадонига чақирув келиб тушган.
Тез тиббий ёрдам бригадаси воқеа жойига зудлик билан етиб борганида, оила аъзолари, хонадон соҳиби Д.Ш. ва унинг турмуш ўртоғи, 1987 йилда туғилган Н.Ш, уларнинг 6 ёшли ўғли А.Й. ҳамда 3 ёшли қизи О.Й.да биологик ўлим аниқланган.
Улар бирламчи текширувдан ўтказилганда ис газидан ўткир заҳарланиш дастлабки ташхиси қўйилган.
Вазирлик томонидан қайд этилишича, мазкур ҳолат юзасидан ҳуқуқни муҳофаза қилувчи идоралар томонидан суриштирув ишлари олиб борилмоқда.
Аввалроқ, Тошкентда аёл икки ёшли фарзанди билан, Фарғонада эса икки ёшли гўдак ва унинг уч ёшли опаси ис газидан заҳарланиб вафот этган эди.
Изоҳ (0)