Устюрт саҳросидаги «Сайгачий» мажмуа ландшафт қўриқхонаси ҳудудларида қурилган тузоқ камераларга Ўзбекистон «Қизил китоби»га киритилган ғаройиб ҳайвонлар ва қушлар тушиб қолди, деб хабар беради ЎзА.
Марказий Осиё чўл ташаббуси (CАDI) лойиҳаси эксперти, биология фанлари номзоди Наталя Мармазинская ўзининг Facebook’даги саҳифасида улашган маълумотига кўра Марказий Осиё чўл ташаббуси (CАDI) лойиҳаси ҳамда Экология ва атроф-муҳитни муҳофаза қилиш давлат қўмитаси ҳамкорлигида ўтказилган дала тадқиқот ишларида Ўзбекистонда кам учрайдиган ҳайвонот турларининг Устюртда пайдо бўлганига гувоҳ бўлган.
Жумладан, Ўзбекистон учун янги тур – оддий лазоревка (Cyanistes caeruleus) қушини айнан Устюртда суратга олишга муваффақ бўлган.
Лойиҳа доирасида 2019 йил апрель ойида «Сайгачий» мажмуа ландшафт қўриқхонаси ва Қўнғирот давлат ўрмон ва овчилик хўжалиги ҳудудида дала тадқиқот ишлари ўтказилган ва натижага кўра биологик хилма-хиллик даражаси юқори бўлган ҳудудлар аниқланган, экотизимлар ва турларнинг ҳозирги ҳолати тўғрисида маълумотлар олинган.
2019 йил ноябрь ойи бошида лойиҳа гуруҳи «Сайгачий» мажмуа ландшафт қўриқхонаси инспекторлари билан биргаликда Устюртда ушбу қўриқхонага қарашли асосий ландшафтлари бўлган Дуана, Жидели, Алмамбет, Чурук, Белеули ҳудудларига 10 та камера ўрнатганди.
Камера тузоқлари ишининг дастлабки натижалари 8 турни ташкил этди, улардан 2 тури (туркман каракали ва корсак) Ўзбекистон «Қизил китоби»га киритилган.
Изоҳ (0)