Ўзбекистонда ички ишлар органлари таянч пункти профилактика инспекторлари томонидан жорий йил 11 ойи давомида 1 190 316 та ҳуқуқбузарлик аниқланди. Бу ҳақда «Дарё»га ИИВ Ҳуқуқбузарликлар профилактикаси бош бошқармаси маълум қилди.
Жумладан, жамоат жойларида спиртли ичимликларни истеъмол қилган 119 526 нафар шахс аниқланиб, уларга нисбатан Маъмурий жавобгарлик тўғрисидаги кодекснинг 187-моддаси 1-қисмида кўрсатилган ҳуқуқбузарликни содир қилганликлари учун маъмурий жазо қўлланди.
Шунингдек, 4 411 нафар шахс бир йил давомида такроран жамоат жойларида спиртли ичимликларни истеъмол қилганлиги аниқланиб, Маъмурий жавобгарлик тўғрисидаги кодекснинг 187-моддаси 2-қисмига асосан суд органлари томонидан қонуний чора кўрилиши таъминланди.
Жумладан, жорий йил 15 декабрь куни Тошкент шаҳри, Яккасарой туманида яшовчи фуқаро Жаҳонгир Ортиқов йил давомида жамоат жойида спиртли ичимлик истеъмол қилганлиги, ички ишлар органлари ходимларининг қонуний талабларини бажармай, қаршилик кўрсатиб, жамиятда юриш-туриш қоидаларини қасддан менсимасдан жамоат тартибини бузганлиги учун Маъмурий жавобгарлик тўғрисидаги кодексининг 183-моддаси, 187-моддаси 2-қисми ва 194-моддаси 2-қисми билан айбли деб топилиб, Яккасарой туман суди томонидан 5 сутка маъмурий қамоқ жазоси тайинланган.
Жорий йилнинг ўтган даври мобайнида жамоат жойларида спиртли ичимликларни истеъмол қилиш ҳуқуқбузарлигини содир этган 119 526 нафар шахсга нисбатан 3 миллиард 84 миллион 634 минг сўм миқдорида жарима солиниб, давлат фойдасига ундирилган.
Изоҳ (0)