Қозоғистон президенти Қосим-Жўмарт Тўқаев Олмаота шаҳри яқини юз берган авиаҳалокат туфайли йиғилиш ўтказди ва мамлакатдаги барча авиакомпанияларни текшириш бўйича топшириқ берди. Бу ҳақда «Tengrinews» хабар тарқатган.
Тўқаев мажлис давомида самолёт ҳалокатини келтириб чиқарган вазият ва шароитларни холис тарзда сифатли ўрганиб чиқиш, «Қозоғистон авиацион администрацияси» АЖ фаолиятига малакали мутахассисларни жалб қилиш ҳамда мамлакатдаги барча авиакомпаниялар ва авиация инфратузилмаларини текширувдан ўтказиб улардаги хавфсизлик талабларини меъёрга келтириш юзасидан топшириқлар берган.
Мавзуга доир:
Қозоғистон бош прокуратураси ва ички ишлар вазирлиги очилган жиноят ишининг суриштируви тергов ишларини олиб бориш давомида авиҳалокат сабабларини аниқлаш, айбдорларга нисбатан қонунчиликда белгиланган тартибда жазо тайинлаш, шунингдек, Олмаота аэропорти яқини объект қурилишининг қай даражада тўғри ёки нотўғри эканини ўрганиш вазифаси юкланган.
Bek Air авиакомпаниясининг самолёти 27 декабрь куни Қозоғистон маҳаллий вақти билан тонги соат 7 да ҳалокатга учраган. Лайнер бортида беш нафар экипаж аъзоси, 93 нафар йўловчи, жумладан, 89 нафар Қозоғистон фуқаролари, икки нафар Украина, бир нафар Қирғизистон ва бир нафар Хитой фуқароси бўлган. Ўзбекистон ташқи ишлар вазирлиги ҳалок бўлганлар орасида ўзбекистонликлар йўқлигини билдирган.
Авиаҳалокат оқибатида 15 нафар одам, хусусан, самолёт командири ҳалок бўлди. Расмий манбалар авиаҳалокат қурбонлари сонининг 12 нафар эканини маълум қилган. Олмаотадаги турли тиббиёт муассасаларига жами 49 нафар одам ётқизилган.Шавкат Мирзиёев Олмаотадаги авиаҳалокат муносабати билан Қозоғистон президентига таъзия билдирган.
Изоҳ (0)