Россиянинг Қалмоғистон республикаси суди Москванинг собиқ мэри Юрий Лужковнинг рафиқаси Елена Батуринага нисбатан жиноий иш қўзғатди. Бу ҳақда «РБК» хабар берди.
Маълум қилинишича, иш Елена Батуринанинг акаси Виктор Батуринга тегишли бизнеснинг молиявий бошқарувчиси Эренсен Манжеевнинг туҳмат ҳақидаги аризасига асосан қўзғатилган.
Маълум бўлишича, Елена ва Виктор Батурин ўртасида Австрияда суд жараёни кетмоқда. Виктор ўз синглиси томонидан берилган маълумот бўйича ҳам баҳслашмоқда. Еленанинг берган маълумотига кўра, унинг акаси улар ўртасида 2007 йилда имзоланган ва улар ўртасидаги эътирозларни тартибга солувчи шартноманинг иловасини сохталаштирган, натижада томонларда турли мазмундаги иловалар юзага келган.
Бу баҳс давомида Елена Россияда Манжеевга нисбатан сохта ҳужжатлар ёрдамида унинг маблағларидан фойдаланганлик бўйича иш тергов қилинаётганини айтган. Манжеевнинг айтишича, Елена томонидан берилган маълумотлар ҳақиқатга тўғри келмайди, шу сабабли у туҳмат бўйича судга мурожаат қилган.
27 декабрда суд Елена Батуринага нисбатан қидирув эълон қилиш ҳақида қарор қабул қилган. Қидирувни амалга ошириш Қалмоғистон Ички ишлар вазирлигига юкланган. Батуринага ички ишлар идораларига учрашиш мажбурияти қўйилган. Қидирув эълон қилинишига Батуринанинг олти марта судга келмагани сабаб бўлган.
Изоҳ (0)