25 декабрь куни Москва шаҳрида Ўзбекистон-Россия вазирликлараро сиёсий маслаҳатлашувларининг навбатдаги раунди бўлиб ўтди, деб хабар берди ТИВ матбуот хизмати.
Ўзбекистон Республикаси делегациясига Ташқи ишлар вазирининг биринчи ўринбосари Илҳом Неъматов бошчилик қилди. Россия Федерациясидан Ташқи ишлар вазирининг ўринбосари Андрей Руденко бошчилигидаги делегация иштирок этди.
Учрашувда сиёсий, савдо-иқтисодий, инвестициявий, илмий-таълим, маданий-гуманитар ва бошқа соҳаларда икки томонлама ҳамкорликнинг ҳозирги ҳолати ва истиқболлари муҳокама қилинди.
2017 йил апрель ойидаги Президент Шавкат Мирзиёевнинг Россияга ва 2018 йил октябрь ойидаги президент Владимир Путиннинг Ўзбекистонга амалга оширган давлат ташрифлари доирасида эришилган келишувларни бажариш жараёни кўриб чиқилди. Савдо-иқтисодий ва инвестиция соҳаларида 2019—2024 йилларга мўлжалланган умумий қиймати 25 миллиард АҚШ долларига тенг бўлган икки томонлама ҳужжатларни амалга оширишни томонлар назорат қилмоқда.
Таъкидланганидек, стратегик шерикчиликни мустаҳкамлашда ўзаро манфаатли савдо-иқтисодий ҳамкорликни кенгайтириш устувор йўналиш ҳисобланади. Унинг ҳажми сўнгги икки йилда 1,5 баробарга ошди. Жорий йилнинг январь ноябрь ойларида товар айланмаси 5,8 миллиард долларни ташкил этиб ўтган йилнинг мазкур даврига нисбатан 14,1%га ошди. Йил бошидан буён 130 та иқтисодий делегацияларнинг ўзаро ташрифлари ташкиллаштирилди.
Шу нуқтаи назардан икки мамлакат ҳудудлари ўртасидаги алоқаларни ривожлантириш муҳим аҳамият касб этади. Ўзбекистон вилоятлари Россиянинг 70 та субъектлари билан самарали муносабатлар ўрнатди.
Маслаҳатлашувларда 2020 йилда Тошкент шаҳрида бўлиб ўтадиган икки томонлама тадбирлар, жумладан, ҳукумат раҳбарлари даражасидаги қўшма комиссия ва иқтисодий ҳамкорлик бўйича ҳукуматлараро комиссиянинг йиғилишларини ўтказиш билан боғлиқ ташкилий масалалар юзасидан фикр алмашилди.
Учрашувда Ўзбекистон-Россия кун тартибининг бошқа долзарб масалалари ҳам муҳокама қилинди.
Изоҳ (0)