O‘zbekiston Respublikasi transport vazirligi veb-saytining interaktiv xizmatlar bo‘limida harakatlar jadvali rukni orqali Islom Karimov nomidagi Toshkent xalqaro aeroporti va Samarqand xalqaro aeroportlari parvozlar jadvalini real vaqt rejimida kuzatib borish imkoniyati yaratildi. Bu haqda O‘zbekiston Respublikasi transport vazirligi axborot xizmati xabar bergan.
Ushbu interaktiv xizmat orqali yuqoridagi ikkita aeroportning xalqaro va mahalliy yo‘nalishlardagi aviaqatnovlari to‘g‘risida batafsil ma’lumot olish mumkin. Yaqin vaqt orasida qolgan barcha xalqaro aeroportlar parvozlar jadvalini ham kuzatib borish imkoniyati yaratilishi kutilmoqda.
Yo‘lovchilar “Toshkent” avtovokzalidan amalga oshirilayotgan shaharlararo va xalqaro yo‘nalishlardagi avtobus qatnovlari to‘g‘risida ham ma’lumot olishi mumkin. Elektron biletlar bo‘limida “Toshkent” avtovokzalidan harakatlanayotgan shaharlararo mahalliy yo‘nalishlardagi avtobus qatnovlariga chiptalarni onlayn xarid qilish xizmati mavjud. Hozirda mamlakatimizning barcha hududlaridan chiptalarni onlayn sotib olish imkoniyatini taqdim etish bo‘yicha ishlar olib borilmoqda.
Bundan tashqari ushbu bo‘limda “O‘zbekiston temir yo‘llari” AJ ning mahalliy va xalqaro yo‘nalishlardagi poyezdlar harakat jadvalini kuzatsa bo‘ladi.
Avtotransportda xalqaro yuk tashuvlari bilan shug‘ullanuvchilarga qulaylik yaratish maqsadida xorijiy/ko‘p tomonlama ruxsatnomalarga milliy tashuvchilardan buyurtmalarni onlayn tarzda qabul qilish tizimi yo‘lga qo‘yildi. Xalqaro yo‘nalishda yuk tashish uchun litsenziyaga ega bo‘lgan tashuvchilar O‘zbekistonning istalgan hududidan, o‘zi uchun qulay bo‘lgan vaqtda arizalarni elektron tarzda jo‘nata oladi.
2020-yilning yanvar oyidan avtomobil transportida yo‘lovchilarni hamda yuklarni shaharda, shahar atrofida, shaharlararo va xalqaro yo‘nalishlar bo‘yicha tashish faoliyatini amalga oshrish uchun litsenziya va litsenziya kartochkalarini elektron shaklda rasmiylashtirish tizimi ishga tushadi.
Izoh (0)