17 декабрь, сешанба куни Сурхондарё вилояти Қумқўрғон тумани «Хўжамулки» маҳалласи ҳудудидаги «Жанубий-Сурхон» сув омбори қирғоғидан 13 ёшли ўқувчининг жасади топилгани ҳақида хабар берилган эди. Халқ таълими вазирлиги мазкур ҳолат бўйича маълумот берди.
Хабар берилишича, Сурхондарё дарёсининг Қумқўрғон тумани «Хўжамулки» маҳалласи ёнидан оқиб ўтувчи қисмида мактаб ўқувчиси жасади топилганлиги тўғрисидаги хабар ўрганилган.Аниқланишича, 2019 йил 12 декабрь куни соат 17:00 атрофида Қумқўрғон тумани »Хўжамулки» маҳалласида жойлашган 6-сонли умумтаълим мактабининг 7-синф ўқувчиси, 2006 йилда туғилган Б.Ў. ўзининг синфдоши, 2006 йилда туғилган А.Ш. томонидан калтакланган ва Сурхондарё дарёсининг «Хўжамулки» маҳалласи яқинидан оқиб ўтувчи қисмига чўктириб юборилган.
Суриштирувлар натижасида аниқланишича, вафот этган Б.Ў.нинг мактабдаги ўқишлари қониқарли бўлган, унинг мактаб ички тартиб қоидаларига риоя этмаслиги бўйича мактаб маъмурияти томонидан ота-оналар йиғилишларида унинг онасига оғзаки билдириш берилган. Ушбу ўқувчининг отаси бир неча йиллардан буён Россияда ишлаётгани сабабли, ўқувчи онаси тарбиясида бўлган.
Марҳумни калтаклаган А.Ш. мактабда яхши баҳоларга ўқиб келган ва синфнинг фаол ўқувчиларидан бўлган, синфдоши Б.Ў. билан бир-бирини мазах қилиши натижасида ўзаро тортишиб қолган ва улар ўртасида жанжал келиб чиққан. Жанжалда А.Ш. синфдоши бошининг орқа қисмига таёқ билан урган ва уни сувга итариб юборган.
Суриштирувлар жараёнида шу мактабнинг 6-синф ўқувчиси, 2007 йилда туғилган Ў.Ж. улар ўртасидаги тортишувга гувоҳ бўлганлиги, бироқ воқеага аралашмаганлиги аниқланди.
Ҳозирда жиноятни содир этган икки нафар вояга етмаган болага нисбатан туман прокуратураси томонидан Ўзбекистон Республикаси Жиноят Кодексининг 97-моддаси 1-қисми билан жиноят иши қўзғатилиб, дастлабки тергов ҳаракатлари олиб борилмоқда.
Изоҳ (0)