Ҳуқуқшунос ва блогер Хушнудбек Худойбердиев ДТМ матбуот анжуманида берган саволи учун журналистдан 200 миллион сўм ундирмоқчилиги тўғрисидаги хабарларга муносабат билдирди.
4 декабрь куни «Gazeta.uz»да мақола эълон қилинган. Унда АОКАда таълим сифатини ошириш, малака талабларига мувофиқ ўқитувчиларни танлаш, ўқитиш усулларини такомиллаштиришга бағишланган матбуот анжумани ўтказилгани баён қилинган. Анжуманда 3 октябрь куни Бош вазир ўринбосари Азиз Абдуҳакимовнинг кўрсатмаси билан ДТМ тегишли ҳокимликлар ва вазирликлар билан биргаликда Сирдарё вилоятидаги мактаб директорлари, вилоят халқ таълими бошқармаси ҳамда туман (шаҳар) халқ таълими бўлими ходимларининг раҳбарлик қобилияти ва бошқарув маҳорати, методистлар ва ўқитувчиларнинг тегишли фан ва давлат тили бўйича билимларини аниқлаш мақсадида 7—15 октябрь кунлари тест синовлари ўтказилгани айтилган.
Ушбу тест натижаларида вилоятдаги 12261 нафар педагог ва мактаб директорларининг 66 фоизи қониқарсиз баҳо олгани маълум қилинган.
Матбуот анжуманида иштирок этган «Gazeta.uz» колумнисти Комил Жалилов Халқ таълими вазирининг биринчи ўринбосари Алишер Умаровга ушбу тестдан намуналар ўқиб эшиттириб, уларнинг ғализ тузилгани ўқитувчи ва мактаб директорининг ярмидан кўпи тест синовларидан ўта олмаганига сабаб бўлган бўлиши мумкинлигини айтган.
Алишер Умаров эса тест саволлари ДТМ базасидан, абитуриентлар университетларга кириш учун топширадиган тестлардан олинганини, ДТМ эса бу тестларни мактаб дарсликлари асосида тузишини билдирган.
ДТМ эса «Gazeta.uz» колумнисти ўқиб эшиттирган тестлар нотўғри ва ДТМ базасида йўқлигини айтмоқда ва нашрни ёлғон маълумот тарқатганликда айблаб судга бериб, ДТМ обрўсига путур етказганлиги учун 200 миллион сўм маънавий зарар ундириш ниятида.
«ОАВни судга бериб бўлмайди, ОАВни судга берган давлат ташкилоти тугатилсин» демоқчи эмасман. ОАВни ҳам судга бериш мумкин ва бу жуда унақа ёмон иш эмас. Телефон ёки бошқа йўллар билан босим қилгандан кўра бу ўта демократик йўл. Ким ҳақ бўлса, судда ютиб чиқсин», — дейди воқеага муносабат билдирган ҳуқуқшунос Хушнудбек Худойбердиев.
Унинг айтишича, давлат ташкилоти ОАВни фақат ўта фавқулодда вазиятлардагина судга бериши керак. Яъни судга беришга сабаб бўлган ҳолат ўта оғир оқибатларни келтириб чиқарган бўлиши лозим. Қолган вазиятларда шунчаки нашр билан боғланиб, раддия беришни сўраши ёки ўз расмий саҳифаларида муносабат билдириши керак.
Суд харажатлари, узоқ давом этадиган суд жараёнларида ДТМдан қатнашадиган вакилларнинг иш ҳақи, транспорт харажатлари ва ҳ.к. чиқимларнинг ўзи судга бериш фойдадан кўра зарар эканлигини англатади. «Албатта, ДТМ буларни ўйламайди, чунки давлат бюджетидан ҳамда абитуриентлардан олинадиган тўловлардан, яъни халқ пулидан кун кўради», — дейди у.
«Шунингдек, давлат ташкилотининг ОАВдан маънавий зарар сўрашини-ку мутлақо ҳазм қилиб бўлмайди. Бу ўта кулгили ва шармандали ҳолат. Яна қайтараман, ўзи халқ пулидан кун кўрсанглар, яна халқдан маънавий зарар ундиришни талаб қилишга уялмайсизларми? ДТМ тижорат ташкилоти эмас-ку, ОАВда чиққан хабар туфайли фойдадан қуруқ қолган бўлса.
Хорижда давлат ташкилотлари ОАВни судга берса (бунақаси кам учрайди), рамзий 1 доллар талаб қилади. Чунки давлат ташкилотининг мақсади суд орқали фақат ҳақиқатни аниқлаштириш бўлади, халқдан пул шилиш эмас.
Агар давлат ташкилотининг раҳбари ёки бирор вакилининг шаъни ва қадр-қиммати топталган бўлса, унда ўша мансабдор ташкилот номидан эмас, ўз номидан судга берса ҳамда маънавий зарар талаб қилса, тўғри тушуниш мумкин. Аммо расман давлат ташкилоти номидан ОАВдан 200 миллион сўм талаб қилса, бу шармандалик.
Уялинг, Мажит Каримов, уялинг...», — деган Хушнудбек Худойбердиев.
Унинг қўшимча қилишича, ДТМ билан судлашиш бўйича камтарона тажрибаси бор. «Улар ўтган йили «Kun.uz» нашрини ҳам ўта кулгили асослар билан судга беришган ва 50 миллион сўм маънавий зарар сўрашганди. Ўшанда судда «Kun.uz» номидан вакил бўлиб қатнашгандим. Суд якуни бўйича ДТМ бир тийин ҳам ололмаган», — дея эслаб ўтган у.
«ДТМ директорига судга бериш тўғрисида ким ақл ўргатяпти билмадим-у, лекин арзимаган важ учун ОАВ билан судлашиб юргунча олдингизда турган минглаб муаммоларни ҳал қилсанглар бўлмайдими? Мана, 2019 йил тугади, лекин ҳалигача келгуси йилда қайси йўналишда қайси фанлардан саволлар тушиши аниқ эмас.
Ёки ўтган йилги тестларда телефон алоқасини тутадиган қурилмалар ишлагани йўқ, абитуриентлар тест пайти бемалол интернетда ўтиришди. Синаш учун ўзим павильонларга бориб, текшириб кўрганимда ҳам ичкарида телефоним ишлаганини яхши биласизлар. ОАВ ва журналистлар билан судлашгунча асосий вазифаларингизни қилсангиз бўлмайдими?», — дея ўз муносабатини якунлаган Хушнудбек.
Ҳуқуқшунос ўз фикрининг сўнгида «Gazeta.uz» ҳамда унинг колумнисти Комил Жалиловга суд жараёнларида ҳуқуқшунос сифатида беминнат ёрдам беришга тайёрлигини билдирган.
Изоҳ (0)