Халқаро пресс-клуб бош продюсери Ғуломжон Самадов 19 декабрь куни сайловларни ёритиш бўйича Халқаро матбуот марказида бўлиб ўтган тадбирда 1999 йилнинг 16 феврали, 2004 йили «Чорсу» бозорида рўй берган ҳодисалар, 2005 йилги Андижон воқеаларини ёдга олди ва ўша пайтдаги вазиятни бугунги кун билан солиштирди, деб хабар беради «Kun.uz».
«Журналист сифатида биз 1999 йил воқеалари, 2004 йилдаги воқеалар, 2005 йилги Андижон воқеаларини ёритганмиз. Баъзида жим ёритганмиз, баъзида елка қисиб қўйганмиз, холос. Чунки Ўзбекистонда бўлаётган воқеа токи биринчи раҳбарнинг фикри, кайфиятига ва айрим ҳуқуқни муҳофаза қилувчи органларнинг хулосасига қарамасдан туриб оммавий ахборот воситаларида берилмасди. Берилсаям бир сатр, бир жумла бериларди. Кимнинг эсида бор, 2000 йилларнинг ўрталарида ‘Термиз—Тошкент’ йўналишидаги самолёт ҳалокатга учраган, шу ҳақдаям бир суткадан кейин қисқагина маълумот берилган», — деган Ғулом Самадов.
Самадовнинг таъкидлашича, журналистларнинг жамиятга қанчалик керак эканлиги Тошкент метрополитени Юнусобод йўлининг янги қурилаётган қисмида юз берган фожиадан сўнг ҳам билинган. Унинг айтишича, ҳодиса ОАВ томонидан жуда фаол ёритилган.
«Ўша сониянинг ўзида сайтларда, ижтимоий тармоқларда воқеанинг тафсилотлари тарқалди. UzReport телеканали воқеа жойидан туриб биринчи марта репортаж қилди. Журналистларнинг у ҳудудга киритилиш-киритилмаслигини бошқа масала. Бунинг ўзининг объектив-субъектив сабаблари бор. Бутун дунёда шундай, фожиа жойига журналистлар суткалаб киритилмайди. Лекин ҳукумат комиссияси тезкорлик билан тузилди, ОАВда ҳар соатда бўлаётган ишлар ҳақида хабардор қилиб борилди. Буям жуда катта ютуқ», — дейди Ғулом Самадов.
Изоҳ (0)