2019 йил 16 декабрь куни Токио шаҳрида Ўзбекистон Республикаси Президентининг Японияга давлат ташрифи арафасида ташкил қилинган Ўзбекистон ва Япония ишбилармон доираларининг бизнес-форуми доирасида Ўзсаноатқурилишбанк «Sumitomo Mitsui Banking Corporation» билан қиймати 100 млн АҚШ долларилик ҳамкорлик келишувини имзолади.
Мазкур ҳужжат савдони молиялаштириш, ғазначилик операциялари, Ўзбекистонда кичик ва ўрта бизнес лойиҳаларини молиялаштириш каби соҳаларда банклараро ҳамкорликни ривожлантиришни назарда тутади
Япония банки молиялаштириш линияси «Ўзсаноатқурилишбанк»ка Япония ва бошқа мамлакатлардан технологик ускуналар ва хизматларни импорт қилишни кўзда тутадиган лойиҳаларни молиялаштириш бўйича ресурс базасини кенгайтириш имконини беради. Қайд этиш жоизки, Япония банки томонидан «Ўзсаноатқурилишбанк» мижозларига товарлар ва хизматлар экспорт-олди молиялаштирилиши учун ресурс тақдим қилиниши ҳам ушбу келишувда кўзда тутилган.
Маълумот учун. «Sumitomo Mitsui Banking Corporation» ва унинг компаниялар гуруҳи ҳам Япония ҳудудида, ҳамда унинг ташқарисида кўплаб молиявий хизматлар кўрсатади. Корпорация фаолияти корпоратив ва чакана банк хизматлари, халқаро капитал бозори, венчур капитали ва қимматли қоғозлар хизматларини ўзида қамраб олган.
Корпорация қароргоҳи Чиодо, Токиода жойлашган бўлиб, 38 давлатда 72 бўлинмаси фаолият кўрсатади. Ташкилотда 70 мингга яқин одам ишлайди. 2018 молиявий йил якунларига кўра, банкнинг умумий активлари 1 трлн 835 млрд долларни, умумий даромади эса 7 млрд 140 млн долларни ташкил этди.
Банк ахборот хизмати
Реклама ҳуқуқи асосида.
Изоҳ (0)