Фарғона вилояти ҳокими Шуҳрат Ғаниев республика ва маҳаллий оммавий ахборот воситалари ходимлари, блогерлар билан учрашиб, уларни қизиқтирган саволларга жавоб берди, деб ёзмоқда ЎзА.

Фото: «Дарё»

Вилоят ҳокими журналистлар томонидан берилган саволларга жавоб бериш асносида вилоятда инвестицияни шакллантириш, туризмни ривожлантириш, мавжуд камчиликларни бартараф этиш борасидаги фикрлари билан ўртоқлашган.

Фото: ЎзА

Шунингдек, у ижтимоий тармоқлардаги турли шов-шувлар, жамиятда журналист ва блогерларнинг ўрни ҳақида ҳам гапирган:

«Мамлакатнинг тараққиётида оммавий ахборот воситаларининг ўрни катта. Шунинг учун ҳам бу касб эгаларини жуда ҳурмат қиламан. Матбуот холислик, ҳаққонийлик ва тўғриликни талаб қилади. Бу мезонларга амал қилган журналистларимиз турли уйдирма ва шов-шувларга учмайди. Шуни алоҳида таъкидламоқчиманки, ҳеч қачон бир томонлама манфаатларни ҳисобга олмаслик керак. Тўғри, баъзи бир танқидий чиқишлар кимларгадир ёқмаслиги аниқ. Раҳбарлар журналист ва блогерлар билан мулоқот қилишдан қочмасдан самарали ҳамкорликни йўлга қўйиш вақти келди. Кўплаб журналист ва блогерлар чиқишларини мунтазам кузатиб бораман. Мен бирорта блогерга устунлик бермоқчи эмасман. Хушнудбек Худойбердиевнинг ижтимоий тармоқлардаги чиқишларини ҳамиша қизиқиб, кузатаман», — дея таъкидлаган Ғаниев.

Фото: ЎзА

Аввал Фарғона вилояти ҳокимлиги ахборот хизмати «Озодлик» канали томонидан тарқатилган «Фарғона ҳокими блогернинг ‘жанозасини ўқиш’ни буюрди» сарлавҳали мақола юзасидан баёнот берган, «Демократик дебат» кўрсатувида иштирок этган Олий Мажлис Қонунчилик палатаси депутати Расул Кушербаев эса прокуратурадан Фарғона вилояти ҳокими Шуҳрат Ғаниев билан боғлиқ навбатдаги шов-шувли ҳолатга ҳуқуқий баҳо беришни сўраганди.

Жорий йилнинг сентябрь ойида Шуҳрат Ғаниев Фарғона вилоятида аёлларнинг рўмол ўрашига қарши кампания эълон қилгани акс этган аудио тарқалгач, ҳоким Сенатнинг Регламент ва одоб комиссияси йиғилишида узр сўраган, унга қаттиқ огоҳлантириш ва 3 ой синов муддати берилган эди.