9-dekabr, dushanba kuni Eronning Zagros Airlines aviakompaniyasi tomonidan “Tehron—Toshkent—Tehron” yo‘nalishidagi ilk muntazam aviareys amalga oshirildi. Delegatsiya Turizmni rivojlantirish davlat qo‘mitasi vakillari tomonidan tantanali kutib olindi. Bu haqda qo‘mita matbuot xizmati xabar bergan.
Xabarga ko‘ra, Eron aviakompaniyasi dastlabki bosqichda mazkur yo‘nalishdagi parvozlarni haftasiga bir marta bajaradi, keyinchalik parvozlar muntazamliligi haftasiga ikki martaga yetkazilishi rejalashtirilgan.
Parvoz 148 kishini o‘zida sig‘dira oluvchi Airbus A320 samolyotida amalga oshirildi. Reysning ilk yo‘lovchilari Eron Islom Respublikasining hukumat vakillari hamda turoperatorlar vakillari bo‘ldi. Ushbu reysning tashkil etilishidan ko‘zlangan maqsad Erondan keluvchi turistik oqimni rivojlantirishdan iborat.
Eron va O‘zbekiston o‘rtasidagi oxirgi reys 2016-yilda amalga oshirilgan. O‘zbekiston va Eron o‘rtasidagi muntazam parvozlarning tiklanishi ikki mamlakat o‘rtasidagi savdo-iqtisodiy, madaniy-gumanitar va sayyohlik sohalaridagi hamkorlikni yanada rivojlantirishga turtki beradi. Statistik ko‘rsatkichlarga ko‘ra, Erondan O‘zbekistonga kelayotgan sayyohlar soni 25 foizga oshgan. Shu yilning yanvar-noyabr oyida O‘zbekistonga 3124 nafar Eron fuqarosi turizm maqsadida tashrif buyurgan. 2018-yilning xuddi shu davrida esa bu ko‘rsatkich 2507 kishini tashkil qilgan.
Eron Islom Respublikasining Zagros Airlines aviakompaniyasi 2005-yilda Obodon shahrida tashkil etilgan. Aviakompaniya Mehrobod va Obodon xalqaro aeroportlaridan o‘zining operatsion bazasi sifatida foydalanadi. Zagros Airlines aviakompaniyasi bugunga kelib Armaniston (Yerevan), Ozarbayjon (Baku), Iroq (Najaf, Bag‘dod), Turkiya (Istanbul, Izmir) va BAA (Dubay) davlatlariga aviaqatnovlarni yo‘lga qo‘ygan.
Avval Transport vazirligi O‘zbekiston va Eron o‘rtasida muntazam parvozlar rasman tiklanganini ma’lum qilgandi.
Izoh (0)