Хивадаги шоир номи билан аталадиган боғ ҳудудида истеъдодли ўқувчилар учун Огаҳий ижод мактаби барпо этилди. Унинг олдида Огаҳий ҳайкали қад ростлади. Бу ҳақда «Ичан–Қалъа» давлат музейи сайтида маълум қилинди.
Бу йил ўзбек мумтоз адабиётининг таниқли намоёндаси — истеъдодли шоир, етук тарихнавис, моҳир таржимон ва давлат арбоби Муҳаммад Ризо Эрниёзбек ўғли Огаҳий таваллудига 210 йил тўлади.
Ушбу қутлуғ санага тайёргарлик кўриш ва муносиб нишонлаш бўйича Ўзбекистон Республикаси Вазирлар Маҳкамаси қарори асосида кенг кўламли тадбирлар амалга оширилмоқда.
«Бундан 30 йил аввал шоирдан ёдгорлик – кўп йиллик тут дарахти муҳофазага олиниб, унинг ёнида Огаҳий уй-музейи барпо этилган эди. Ҳозирда «Ичан–Қалъа» давлат музей–қўриқхонаси томонидан уй–музейда қурилиш ишлари ниҳоясига етказилди», — дейилади хабарда.
Шунингдек, янги ижодий лойиҳа асосида экспозициялар ташкил этилиб, янги тарихий экспонатлар билан бойитилди. Экспозициядаги Огаҳий яшаган даврга оид ва шоир ҳаёти ҳамда ижоди билан боғлиқ нодир асори–атиқалар, қўлёзма асарлар нусхалари ҳамда Ўзбекистон халқ рассоми Тўра Қурёзов мўйқаламига мансуб Огаҳий бадиий-тарихий китоблари мазмуни асосида яратилган тасвирий санъат асарлари бу ерга ташриф буюрувчиларга ўзгача завқ ва таассурот бахш этади, дейилади хабарда.
Уй-музей замонавий техник жиҳозлар билан таъминланган. Махсус залда давра суҳбатлари, маҳорат дарслари, шунингдек, Огаҳий ҳаёти ва ижоди ҳақидаги видеоролик ва ҳужжатли фильмларни томоша қилиш имконияти яратилган.
Уй–музей ҳамда янги бунёд этилган шоир номидаги ижод мактаби Огаҳий таваллудининг 210 йиллигига муносиб туҳфа бўлди, дейилади хабарда.
Изоҳ (0)