25 ноябрь куни соат 18:55 да Когон шаҳрида яшовчи фуқаро Азамат Ёдгоров икки нафар фарзандини Республика шошилинч тиббий ёрдам илмий маркази (РШТЁИМ) Бухоро филиалига келтирган. У фарзандларида тана ҳароратининг кўтарилиши, кўнгил айниши, қусиш, ҳолсизлик, уйқучанлик ҳолатлари юзага келаётганидан шикоят қилган.
Болаларнинг аҳволи ўта оғирлиги инобатга олиниб, «Ўткир респиратор инфекция. Оғир кечуви. Гипертермик синдром» ташхиси билан улар болалар реанимацияси бўлимига ётқизилган. Бўлим бошлиғи Баҳриддин Мамедовнинг «Дарё»га маълум қилишича, олиб борилган даво чораларига қарамай, 2013 йилда туғилган Амир Ёдгоровда 29 ноябрь куни соат 13:00 да биологик ўлим қайд этилган.
Қайд этиш жоиз, аввалроқ ижтимоий тармоқларда «Вафот этган боланинг онаси мурожаати» тарқалган эди. Унда, жумладан, ота-она фарзандларини шифохонага олиб келганида уларнинг фақат томоғи оғриб, иситмаси бўлгани, ярим тунда эса улар комага тушиб қолгани, оила бошлиғи Тошкентдан шифокорларни ўз ҳисобидан чақиртиргани таъкидланган.
«29 ноябрь куни ўғлим ўлди. Унинг ўлимидан сўнг уйимизга ҳамма — Когон ҳокими, прокуратура, санепидемназорат ходимлари келди. Бизга ўғлимизнинг ўлимига ис газидан заҳарланиш сабаб бўлгани ҳақида хулоса беришди. Бу ғирт ёлғон! Шаҳар газ идораси ходимлари келиб, уйда ҳеч қандай газ сизиши бўлмагани ҳақида далолатнома тузиб кетган. Биз ҳали ҳам аслида нима бўлганини ва ташхис қандайлигини билмаймиз. Атроф тўла уқувсиз шифокорлар... Қизимизни қутқариб қолишга ёрдам беринг! Биз вилоят ҳокими Ўктам Барноевнинг ушбу муаммога шахсан аралашишини истаймиз», — дейилади мурожаатда.
— Шу куни болаларнинг отаси 2016 йил туғилган қизи Алияни оғир аҳволда, эс-ҳуши карахт, ҳолсиз, интоксикация белгилари юқори даражада олиб келди. Қўл-оёғида тонус кучайган, ҳансираб нафас оларди. Юрак тонлари бўғиқ, юрак уриши тезлашган, кома ҳолатида эди. Ўғли ҳам ўз оёғи билан ҳуш-беҳуш юриб келган бўлса-да, беморлик ҳолатлари бир хил эди. Иккисига ҳам санитар авиация йўналиши билан РШТЁИМдан токсиколог, трансфузиолог ва реаниматолог, доцент Гуля Ҳамроева, РШТЁИМ Бухоро филиали директори, бош шифокор ва бўлим бошлиқлари томонидан консилиум ўтказилди ва тавсиялар берилди. Амирга плазмоферез ўтказилди, — деди болалар реанимация бўлими бошлиғи Баҳриддин Мамедов.
Мамедовнинг таъкидлашича, бемор болаларни уч кун давомида уй шароитида, шифокор маслаҳатисиз даволашган. «Цинепар сироп», «Парацетамол» шамча, ягурта ичимлиги, «Реоксолин» воситалари орқали уларнинг ҳароратини 35,5 даражага туширишган. Кўп ўтмай, болалар ҳарорати яна 38—39 даражага кўтарилган. Шундай оғир ҳолатда ҳам таниш ҳамширани олиб келиб, уй шароитида «Цефтираксион» дори воситасини қўллашган.
— Эрталаб болаларини қайнонасига топшириб, ота ишга жўнаган. Болалар телевизор кўриб, компьютер ўйнашган бўлишса-да, ҳол-беҳол бўлишган. Отасининг айтишича, бетоб невараларига қараб турган буви уларга уй шароитида тайёрланган бақлажон икраси ҳамда блинчик пишириб берган. Бундан ташқари, ўша кунларда ҳаво ҳарорати пасайгани сабабли хонадонда уйни иситиш учун табиий газ плитасидан фойдаланилган. Болаларда қусиш кучайиб, иситма яна ҳам кўтарилган. Ота ишдан қайтгачгина, болаларини касалхонага олиб келган, — дея сўзида давом этди шифокор.
Болалар зудлик билан муолажалар столига ётқизилган. Ҳар уч соатда уларда иситма, қусиш, талваса ҳолати юзага кела бошлаган. Ошқозонлари ювилиб, қон ва пешоб анализлари Бухоро вилоят суд-тиббиёт экспертизасига жўнатилган.
Консилиум натижалари асосида болаларга «Ис газидан ўткир заҳарланишнинг оғир даражаси. Гипоксик бош мия шиши. Мия комаси 2-даражаси. Ўткир нафас етишмовчилиги 3-даражаси. Ўткир юрак қон-томир етишмовчилиги 3-даражаси. Талваса синдроми» ташхислари қўйилган. Ҳар икки бемор ҳам кома ҳолатида IVL аппаратида вазопрессор дори воситалари фонида даволанган. Даволашда қон компонентлари қўйилган, оксигенотерапия, интоксикацияга қарши ва реанимацион чора-тадбирлар қўлланилган.
— Болалар ҳаётини сақлаб қолиш учун бор имкониятдан фойдаландик. Нафақат вилоят, балки санитар авиация йўналиши орқали жуда тезкор равишда Бухорога етиб келган республика даражасидаги энг тажрибали шифокорлар ҳам жалб этилди. Афсуски, 6 яшар бола ҳаётини сақлаб қолишнинг имкони бўлмади. Айни пайтда 3 ёшли бемор ҳам оғир, кома ҳолатида. У ИВЛ аппаратида вазопрессор дори воситалари фонида даволанмоқда, — деди РШТЁИМ Бухоро филиали директори Мажид Кенжаев.
Болаларнинг отаси Азамат Ёдгоров ҳамда амакиси Дамир Жўраев «Дарё» мухбири билан суҳбатда шифокорлар уларнинг ҳаётини сақлаб қолиш учун бор имкониятларни қўллашганига қарамай, ўғли вафот этганини аччиқ ҳасрат билан таъкидлади.
— Малакали шифокорлар қизим атрофида. Аллоҳдан шифо сўраймиз. Аммо болаларим газдан заҳарланмаган. Улар вирусга чалинган. Экспертиза хулосасини кутаяпмиз, — дейди Азамат Ёдгоров.
Маълумотга кўра, болаларнинг онаси Диляра Ёдгорова 8 ойлик ҳомиласи билан Бухоро вилоят перенатал марказида даволанмоқда.
— Суд-тиббий экспертизага юборилган қон таҳлилида 11,7 фоиз карбоксигемоглобин миқдори аниқланган. Айтишим жоизки, бизнинг вазифамиз беморга қараш, уни комадан чиқариш, қандай кўринишдаги касаллик бўлишидан қатъи назар, муолажаларда давом этиб, уларнинг соғлиғини таъминлаш, — дейди Баҳриддин Мамедов.
Болалар РШТЁИМ Бухоро филиалига ётқизилган кун вилоят раҳбари Ўктам Барноев болалар реанимацияси бўлимига келган ва болалар ҳолидан хабар олган.
Изоҳ (0)