Ўзбекистонда илмий-тадқиқот муассасалари рейтингини аниқлаш тартиби тўғрисида Вазирлар Маҳкамасининг тегишли қарори лойиҳаси муҳокама учун жойлаштирилди.
Унга кўра илмий-тадқиқот муассасалари рейтингини аниқлаш тартиби тўғрисидаги низом тасдиқланади. Республикада фаолият кўрсатаётган илмий-тадқиқот муассасалари рейтингини шакллантиришга Инновацион ривожланиш вазирлиги масъул этиб белгиланмоқда.
Вазирликнинг бу борадаги асосий вазифалари қаторига илмий-тадқиқот муассасаларининг илмий-тадқиқот ва инновацион фаолияти даражаси, илмий-тадқиқот ишлари сифати, илмий-инновацион фаолият натижаларини тавсифловчи маълумотлар базасини тизимли асосда шакллантириш, жаҳондаги етакчи рейтинг ташкилотлари билан ҳамкорлик қилиш, рейтинг натижалари асосида республика илмий-тадқиқот муассасалари фаолияти тўғрисида таҳлилий ахборот тайёрлаш ва ҳар йили рейтинг натижаларини Инновацион ривожланиш вазирлигининг расмий веб-сайтида эълон қилиш кабилар киритилган.
Тегишли вазирликлар ва идораларнинг масъул таркибий бўлинмалари ҳамда илмий-тадқиқот муассасалари томонидан рейтингни аниқлашга доир маълумотлар тўпланади, таҳлил қилинади ҳамда ҳар йили 1 февралга қадар Инновацион ривожланиш вазирлигига тақдим этилади.
Илмий-тадқиқот муассасалари рейтингини аниқлаш тартиби тўғрисидаги низомга кўра, илмий-тадқиқот муассасалари ўртасида соғлом рақобат муҳитини шакллантириш, уларнинг илмий-инновацион фаолияти даражаси ва сифатини оширишни рағбатлантириш, илмий ходимларнинг илмий салоҳиятидан самарали фойдаланиш, иқтисодиётнинг реал сектори тармоқлари учун илмий ҳажмдор маҳсулотлар ва технологияларни тайёрлашга замин яратиш рейтингни аниқлашнинг мақсади ҳисобланади.
Изоҳ (0)