Бухоро вилояти Шофиркон туманида депутатлик сўрови туфайли қатор йўллар таъмирланди. Бу ҳақда вилоят ҳокимлиги ахборот хизмати хабар берди.
Халқ депутатлари Шофиркон тумани Кенгаши депутати Ҳамрогул Ашурова 2017 йил 13 мартида «Қалмоқон» МФЙдаги Қалмоқон, Файзулло Хўжаев, Истиқлол кўчаларида истиқомат қилувчи фуқаролар талабидан келиб чиққан ҳолда бевосита мутасадди корхонага ички йўлларни асфальтлаш мурожаати билан чиққан. Ўрганишдан аён бўлишича, ҳудудда таъмирлаш ишлари пайсалга солингани боис депутат Ҳамрогул Ашурова 2019 йил 30 апрелида худди шу масалада такрор мурожаат қилган.
Шундан сўнг вилоят Автомобиль йўллари ҳудудий бошқармасига қарашли Шофиркон тумани йўллардан фойдаланиш унитар корхонаси директори вазифасини вақтинча бажарувчиси Алишер Ҳамидов имзоси билан мурожаат муаллифи, яъни туман Кенгаши депутатига шу йилнинг 8 май куни 206-сонли жавоб хати йўлланган. Унда жумладан, жорий йил якунига қадар ҳудуддаги ички йўлларнинг бир қисмини асосига шағал бостирилиб, асфальтлаштирилиши билдирилган.
Манзиллар жойида ўрганилганида, чиндан ҳам «Қалмақон» МФЙдаги Қалмақон, Файзулло Хўжаев, Истиқлол ҳамда «Зарчабек» МФЙ ҳудудидаги Зарчабек, Фарҳод, Тарозидор кўчаларининг ички йўллари таъмирга муҳтожлиги аниқланди.
Туман йўллардан фойдаланиш унитар корхонаси 2019 йилда маҳаллий ҳокимлик балансида бўлган умумий фойдаланувдаги мазкур қишлоқ аҳоли пунктларининг ички кўчалари қисман таъмирланган. Аниқ айтганда, манзилли дастур бўйича «Зарчабек» МФЙ Зарчабек қишлоғида узунлиги 565 метр, шунингдек, Фарҳод кўчасида 1270 метр йўл қисми рисоладагидай кўринишга келтирилиб, асфальтлаштирилган.
«Қолган манзиллардаги кўчалар эса юқорида корхона директорининг туман Кенгаши депутатига тақдим қилган жавобида таъкидланганидек, туман тасарруфидаги ички хўжалик йўлларини 2019—2022 йилларда жорий, тўла ва қайта қуриш учун тузилган дастлабки манзилли дастурга биноан ‘Зарчабек’ МФЙ Тарозидор кўчасининг 1 километри, ‘Қалмоқон’ МФЙ Қалмоқон кўчасининг 1,1 километри ва Истиқлол кўчасининг 1 километр қисмида бажариладиган таъмирлаш ишлари молиялаштирилмоқда», — дейилади хабарда.
Изоҳ (0)