Шавкат Мирзиёев Тошкентни айланди. Ўзбекистон Президенти дастлаб Мирзо Улуғбек туманидаги IT-паркда бўлди ва унинг янги босқичи қурилишига тамал тошини қўйди. Сўнг «Ўзекспомарказ»да ўтаётган Саноат ярмаркаси ва кооперация биржаси билан танишди. Шунингдек, Ислом цивилизацияси маркази қурилишини бориб кўрди.
Фото: Президент матбуот хизмати
Етти, етти, етти: Жиззахда ИИБ биносини таъмирлаётган етти уста ис газидан заҳарланиб ўлди. Самарқандда суюлтирилган газ ташувчи машина портлаши оқибати унга қўшилиб яна олтита транспорт воситаси ёниб кетди. Қашқадарёда бир оиланинг етти аъзоси бодринг-помидор конверсасидан заҳарланган эди, уларнинг икки нафари вафот этди.
Ўзбекистонда раҳбарият юксак лавозим таклиф қилса, рад этиш мумкинми? Раҳбарият рад жавобига қандай муносабат билдиради? Ўзбекистон Сенати раиси Танзила Норбоева жавоб беради. У, шунингдек, ҳукуматни халқдан хафа бўлмасликка чақирган, ОАВдан яшириниб юрган амалдорлар — вақтинчалик ҳолат эканини айтган.
«Ўзгидромет» Қамчиқ довонида 21—25 ноябрь кунлари кучли қор ёғиши мумкинлиги ҳақида огоҳлантирди (қиш бошланди). «Туман тушиб, кўринувчанлик 50 метргача пасаяди, шамол секундига 17—22 метр тезликда эсади. 21—23 ноябрда ҳарорат -5...-3 даражагача, 24—25 ноябрда -13...-8 даражагача совийди. Йўлда қор уюмлари, музламалар ҳосил бўлади», — дейилади хабарда.
«У янги ҳаёт бошлаш учун Россияга бориб келганди». Қашқадарё шилқим ҳайдовчининг хатти-ҳаракатлари сабаб фожиали ҳалок бўлган актриса Гавҳар Шарипова ҳақида унинг ҳамкасблари ва дўстлари фикр билдирди. Уларнинг айтишича, актриса сўнгги вақтларда тушкун кайфиятда бўлган, «дўстлари унинг қўнғироқларига жавоб бермаган».
Жиззахда 15 ёшли ўқувчи қиз она бўлди. Туғуруқхона бу ҳақда прокуратурага хабар берган, прокуратура эса «16 ёшга тўлмаган шахс билан жинсий алоқа қилиш» моддаси бўйича иш очган. Аввалроқ шунга ўхшаш ҳодисалар Қашқадарё, Фарғона вилоятлари ва Тошкент шаҳрида ҳам қайд этилган эди.
Ўзбекистонда яна нима гап? 2020 йил учун давлат бюджети тўғрисидаги қонун лойиҳасига депутатлар томонидан 20 га яқин ўзгартириш киритилмоқда. 10 ой ичида 4 миллиард долларлик олтин экспорт қилинди. Термизда 10 ой ичида 672 та дайди ҳайвон йўқ қилинди. Олий Мажлисга кўрсатилган депутатликка номзодлар ичида марҳумлар ҳам борлиги ҳақида гап-сўзлар тарқалди. Қозоғистонда ўзбекистонлик донорларнинг органларини Исроилга сотган шифокор ҳибсга олинди. Андижондаги уйда газ портлади, уч киши куйди. Ўзбекистон Афғонистонга гуманитар ёрдам жўнатди. «Би-би-си» ўзбек миллий таомлари соғлиқ учун фойдали эканлигини эътироф этди. Ҳабиб Нурмагомедов Тошкентга келмоқда.
Жаҳонда-чи? Афғонистон президенти мамлакатда ИШИД фаолиятига бутунлай барҳам берилганини маълум қилди. АҚШ Сенати Гонконгдаги вазият бўйича қонун лойиҳасини ишлаб чиқди, Гонконг ҳукумати эса Америкадан унинг ички сиёсатига аралашмасликни сўради. Эрондаги норозилик намойишларида ҳалок бўлганларнинг сони 100 нафардан ошди. Ироқдаги норозилик намойишларида нефть терминаллари ва конларига олиб борувчи йўллар ҳам ёпиб қўйилди. Александр Лукашенко кетма-кет олтинчи марта Беларусь президентлигига сайловларда иштирок этишини маълум қилди. Италияда уй ҳайвонларининг ҳуқуқлари болалар ҳуқуқлари билан тенглаштирилиши мумкин.
