Андижон вилоятининг Балиқчи туманида ғишт ишлаб чиқариш корхонаси газ тармоғига ноқонуний уланиб, давлатга 3 миллиард 460 миллион 429 минг сўм зарар етказгани аниқланди. Бу ҳақда «Дарё»га МИБ матбуот хизмати маълум қилди.
МИБ Балиқчи туман бўлими томонидан 2018 йил 20 октябрь куни ўтказилган текширишда фуқаро М.Ж ва Х.С. олдиндан тил бириктириб, туман аҳолиси учун ажратилган газ тармоғига газ ҳисоблагич ускунасидан ташқари яширин тарзда ер остидан ўзбошимчалик билан уланиб, ғишт ишлаб чиқариш корхонасида табиий газдан ноқонуний фойдаланган ҳолда оҳак маҳсулоти ишлаб чиқариш билан шуғулланиб келганлиги аниқланган.
Оқибатда таъминотчи корхона манфаатларига 184 миллион 615 минг сўм зарар етказилган.
2019 йил 17 апрель куни М.Ж. ва Х.С. бундан жиноятни такроран содир этгани аниқланган. Корхона «Балиқчи газ тақсимлаш шохобчаси»дан аҳоли учун тортилган юқори босимли газ тармоғига ўзбошимчалик билан уланиб, оҳак маҳсулотлари ишлаб чиқарган. Оқибатда етказилган зарар миқдори 3 миллиард 460 миллион 429 минг сўмни ташкил этган.Мазкур ҳолат юзасидан М.Ж. ва Х.С. Жиноят кодексининг 185-2-моддаси 4-қисми (Умумий фойдаланишдаги электр, иссиқлик, газ ёки водопровод тармоқларига ўзбошимчалик билан уланиш орқали жуда кўп миқдорда зарар етказиш) билан айбдор деб топилиб, жиноят ишлари бўйича Марҳамат туман суди томонидан уларга нисбатан 2 йилга озодликдан маҳрум қилиш жазоси тайинланган.
Шунингдек, суд ҳукми билан жиноят оқибатида етказилган 3 миллиард 645 миллион 44 минг сўм моддий зарар М.Ж. ва Х.С.дан «Ўзтрансгаз» АЖ Андижон вилоят бўйича газ таъминоти ҳудудий филиалига ундириб берилиши белгиланган.
Изоҳ (0)