Professional boksning super o‘rta (-76,2 kg) vazn toifasida ringga chiqayotgan Bektemir Meliqo‘ziyev (3-0, 3 KO) AQShning mashhur Golden Boy promouterlik kompaniyasi bilan shartnoma imzoladi. Bu haqda kompaniya o‘zining Twitter’dagi sahifasida ma’lum qilgan.
Promouterlik kompaniyasi rahbari, sobiq bokschi Oskar de la Hoya Meliqo‘ziyev bilan tuzilgan shartnomadan so‘ng o‘z fikrlari bilan o‘rtoqlashgan.
“Biz “Mir boksa” (World of Boxing) bilan Bektemir Meliqo‘ziyevning faoliyatini targ‘ib qilishda hamkor bo‘lganimizdan xursandmiz. Bu yigit — mutlaq vahshiy yirtqich. U kuchli, chidamli, oyoq va qo‘l harakatlari ham juda tezkor. Ayniqsa bu vazn toifasi uchun sezilarli darajada. Biz uning reytingda juda tez ko‘tarilishini barchaga ko‘rsatib qo‘yishini sabrsizlik bilan kutmoqdamiz”, — deydi De la Hoya.
“Bektemir hali yosh, ammo shunga qaramay o‘ta tajribali va havaskor boksda o‘zining iqtidorini namoyish etishga muvaffaq bo‘lgan. O‘zi ham professional boksning eng yuqori cho‘qqisiga chiqqan Oskar de la Hoyadek funksioner bilan hamkorlik natijasida Bektemirning ham yuqori cho‘qqilarni zabt etishiga ishonchim komil”, — degan “Mir boksa” rahbari Andrey Ryabinskiy.
“Bek — ringda haqiqiy bezori, ammo ringdan tashqarida juda yoqimli va quvnoq bola. Men Golden Boy bilan hamkorlikda u allaqachon erishib bo‘lgan yulduzlikning eng yuqori cho‘qqisiga chiqishini sabrsizlik bilan kutmoqdaman”, — deydi Meliqo‘ziyevning menejeri Vadim Kornilov.
Shuningdek, Bektemir Meliqo‘ziyevning o‘zi ham yangi shartnomadan so‘ng o‘z fikrlarini bildirib o‘tgan.
“World of Boxing va Golden Boy bilan hamkorlikda uzoq va muvaffaqiyatli faoliyat yuritishimga ko‘zim yetmoqda. Bunday professional jamoaga ega ekanim juda ham yoqimli. Men ularning ko‘pchiligini bokschi sifatida o‘tkazgan janglarini TV orqali ko‘rardim va qachondir AQShda xuddi ulardek janglar o‘tkazishni orzu qilardim. Endi bu imkoniyat menda bor va undan bor qobiliyatimni ishga solib foydalanaman. Chalg‘ib qolmang, endi barcha janglarim o‘tkazib yuborish mumkin bo‘lmaydigan darajada ajoyib spektaklga aylanadi”, — deya Meliqo‘ziyev so‘zlarini keltirmoqda GoSport.
Eslatib o‘tamiz, Bektemir Meliqo‘ziyev dekabr oyida o‘zining ilk chempionlik kamari uchun ringga chiqadi. Unga fransiyalik sobiq jahon chempioni Hassan N’Dam N’Jikam (37-4, 21 KO) raqiblik qilishi kutilmoqda.
Yanada ko‘proq futbol va sport yangiliklaridan boxabar bo‘lishni istasangiz, “Daryo”ning Telegram’dagi rasmiy sport kanali — @daryo_sport’ga obuna bo‘ling!
Izoh (0)