Словакия ғарбидаги Нитра шаҳрида содир бўлган йўл транспорт ҳодисаси оқибатида 12 нафар йўловчи, жумладан тўрт нафар бола ҳаётдан кўз юмди. Автобус ва юк машинаси тўқнашувида жароҳат олган 17 нафар одам шифохоналарга олиб кетилган. Бу ҳақда Словакия республикаси тиббий тезкор хизмат кўрсатиш маркази вакили Йозеф Минар маълум қилган.
Аввалроқ Frans Press нашри ёнғин хавфсизлиги хизмати ахборотига асосланиб автоҳалокатда 13 нафар одамнинг ҳалок бўлгани ва 20 нафар йўловчининг жароҳатланганини хабар қилган.
«Автобус ҳамда юк машинаси тўқнашувида 12 нафар одам, жумладан 4 нафар бола ҳалок бўлган. Қолган 17 нафар йўловчи жароҳатланган. Ушбу рақамлар яна ўсиши мумкин. Транспорт ҳодисаси содир бўлган жойда шифокорлар, ўт ўчирувчилар ва полиция ходимлари ишламоқда», — дея таъкидлаган Минар.
Словакия ички ишлар вазири Денис Сакова ҳам воқеа жойини келиб ўрганган. Мамлакат бош вазири Петер Пеллегрини эса ушбу ҳодиса туфайли Кипрга қилаётга сафарини қолдириб, Словакияга қайтган.
Аввал Саудия Арабистонида автобуснинг юк машинаси билан тўқнашувидан кейин содир бўлган ёнғинда 36 нафар зиёратчи, Непалда дарёга қулаган автобусда 15 нафар йўловчи ҳамда Перуда қуюқ туман шароитида автобуснинг жарликка қулаши оқибатида 19 нафар одамнинг ҳалок бўлгани ҳақида хабарлар берилган. Шунингдек, 8 ноябрда Тошкент вилоятида иккита Isuzu автобуси иштирокидаги автоҳалокат тафсилотлари ҳақида ҳам ёзилган.
Изоҳ (0)