Исроилнинг NSO Group фирмаси томонидан ишлаб чиқилган дастурий таъминот WhatsApp иловаси орқали камида 20 мамлакатда амалдорлар ёки ҳарбийларни кузатган. Бу ҳақда Reuters хабар берди.
Facebook компанияси 29 октябрь, сешанба куни Калифорния штатида NSO Group’га нисбатан қонуний чора кўриш юзасидан судга мурожаат қилган. Компания Исроил фирмасини WhatsApp иловаси орқали жосусликни амалга оширгани ва одамларни кузатганини аниқлаган. Шикоятга кўра, NSO Group жорий йилнинг апрель—май ойларида WhatsApp’нинг АҚШ ва бошқа давлатлардаги серверларидан фойдаланиб, 1400 та мобил ва бошқа қурилмага зарарли дастурий таъминотни юборган.
Ушбу дастур орқали хориждаги одамларнинг мобил қурилмадаги хабарлари, амалга оширилган қўнғироқлар ҳақидаги маълумотлар ва улар жойлашган манзил хусусидаги ахборотларга йўл очилади. Судга қилинган мурожаатда NSO Group вакиллари ўзлари ушбу дастурни ишлатгани ва уни буюртма қилганларга етказиб бергани маълум қилинган.Reuters агентлиги манбаларига асосланиб, NSO Group ҳарбийлар ва ҳукумат вакилларига тегишли ахборотларни телекоммуникация тармоқларини айланиб ўтган ҳолда ноқонуний йўл билан қўлга киритган. Судга тақдим қилинган материалда маълумотларнинг асосан Вашингтон билан иттифоқдош давлатларга тааллуқли эканлиги қайд этилган. Мамлакатларнинг тўлиқ рўйхати берилмаган. Хакерлик ҳужумининг ким томонидан буюртма қилингани ҳам номаълум.Киберҳужумлар уюштирилган қурилмаларнинг эгалари орасида АҚШ, БАА, Баҳрайн, Мексика, Покистон ва Ҳиндистонда яшовчи одамлар бор. NSO Group’нинг дастурий таъминот воситасида ҳарбийларни ёки давлат амалдорларини кузатганлигига ҳам аниқлик киритилмаган.
Изоҳ (0)