Isroilning NSO Group firmasi tomonidan ishlab chiqilgan dasturiy ta’minot WhatsApp ilovasi orqali kamida 20 mamlakatda amaldorlar yoki harbiylarni kuzatgan. Bu haqda Reuters xabar berdi.
Facebook kompaniyasi 29-oktabr, seshanba kuni Kaliforniya shtatida NSO Group’ga nisbatan qonuniy chora ko‘rish yuzasidan sudga murojaat qilgan. Kompaniya Isroil firmasini WhatsApp ilovasi orqali josuslikni amalga oshirgani va odamlarni kuzatganini aniqlagan. Shikoyatga ko‘ra, NSO Group joriy yilning aprel—may oylarida WhatsApp’ning AQSh va boshqa davlatlardagi serverlaridan foydalanib, 1400 ta mobil va boshqa qurilmaga zararli dasturiy ta’minotni yuborgan.
Ushbu dastur orqali xorijdagi odamlarning mobil qurilmadagi xabarlari, amalga oshirilgan qo‘ng‘iroqlar haqidagi ma’lumotlar va ular joylashgan manzil xususidagi axborotlarga yo‘l ochiladi. Sudga qilingan murojaatda NSO Group vakillari o‘zlari ushbu dasturni ishlatgani va uni buyurtma qilganlarga yetkazib bergani ma’lum qilingan.Reuters agentligi manbalariga asoslanib, NSO Group harbiylar va hukumat vakillariga tegishli axborotlarni telekommunikatsiya tarmoqlarini aylanib o‘tgan holda noqonuniy yo‘l bilan qo‘lga kiritgan. Sudga taqdim qilingan materialda ma’lumotlarning asosan Vashington bilan ittifoqdosh davlatlarga taalluqli ekanligi qayd etilgan. Mamlakatlarning to‘liq ro‘yxati berilmagan. Xakerlik hujumining kim tomonidan buyurtma qilingani ham noma’lum.Kiberhujumlar uyushtirilgan qurilmalarning egalari orasida AQSh, BAA, Bahrayn, Meksika, Pokiston va Hindistonda yashovchi odamlar bor. NSO Group’ning dasturiy ta’minot vositasida harbiylarni yoki davlat amaldorlarini kuzatganligiga ham aniqlik kiritilmagan.
Izoh (0)