Собиқ «Абу Сахий» бозорида аравакашлар ўртасида юз берган жанжал оқибатида 1 киши ҳалок бўлди

Ўзбекистон ИИВ Тергов департаменти Тошкент савдо маркази ҳудудида юз берган ҳолат юзасидан расмий баёнот берди.

Ижтимоий тармоқларда 28 октябрь, душанба куни «Тошкент савдо маркази бозори ҳудудида пичоқлашув юз берди. Дўкон ишчиси ўлди, аравакашлар ҳибсга олинди» сарлавҳаси остида хабарлар тарқалди.

Аниқланишича, 25 октябрь куни тахминан соат 11:30 да Тошкент вилояти Зангиота тумани ҳудудида жойлашган Тошкент савдо мажмуасига кириш қисмидаги биринчи қатор бошидаги дўкон ёнида мазкур мажмуада арава ҳайдовчи фуқаролар Ғ.Н., М.Н., А.Қ, С.М ва И.Н. ўртасида жанжал келиб чиқади. Жанжал оқибатида Ғ.Н. И.Н.ни савдо растасида бўлган темирдан ясалган полтаёқ билан бир неча марта уриб, тан жароҳати етказган.

И.Н. олган тан жароҳатлари оқибатида кўрсатилган тиббий ёрдамга қарамай республика шошилинч тез тиббий ёрдам марказининг жонлантириш бўлимида вафот этди.

Ҳолат юзасидан жиноят иши қўзғатилган, тергов ҳаракатлари олиб борилмоқда.