Sobiq “Abu Saxiy” bozorida aravakashlar o‘rtasida yuz bergan janjal oqibatida 1 kishi halok bo‘ldi

O‘zbekiston IIV Tergov departamenti Toshkent savdo markazi hududida yuz bergan holat yuzasidan rasmiy bayonot berdi.

Ijtimoiy tarmoqlarda 28-oktabr, dushanba kuni “Toshkent savdo markazi bozori hududida pichoqlashuv yuz berdi. Do‘kon ishchisi o‘ldi, aravakashlar hibsga olindi” sarlavhasi ostida xabarlar tarqaldi.

Aniqlanishicha, 25-oktabr kuni taxminan soat 11:30 da Toshkent viloyati Zangiota tumani hududida joylashgan Toshkent savdo majmuasiga kirish qismidagi birinchi qator boshidagi do‘kon yonida mazkur majmuada arava haydovchi fuqarolar G‘.N., M.N., A.Q, S.M va I.N. o‘rtasida janjal kelib chiqadi. Janjal oqibatida G‘.N. I.N.ni savdo rastasida bo‘lgan temirdan yasalgan poltayoq bilan bir necha marta urib, tan jarohati yetkazgan.

I.N. olgan tan jarohatlari oqibatida ko‘rsatilgan tibbiy yordamga qaramay respublika shoshilinch tez tibbiy yordam markazining jonlantirish bo‘limida vafot etdi.

Holat yuzasidan jinoyat ishi qo‘zg‘atilgan, tergov harakatlari olib borilmoqda.