Жиноят ишлари бўйича Самарқанд вилояти судида судья Т.Қодиров раислигида Паяриқ туманида турмуш ўртоғини ваҳшийларча ўлдирган А.Б.га нисбатан суд иши бошланди. Бу ҳақда «Xabar.uz» маълум қилди.
Хабар берилишича, судланувчи А.Б. 2019 йил 7 август куни соат 14:30 да Самарқанд вилояти Паяриқ тумани «Ғойиб ота» маҳалласида жойлашган «Челак деҳқон бозори» МЧЖ ҳудудида тадбиркор V.Г.га тегишли савдо растасига сотиш учун қўйилган ошхона пичоғи билан 1993 йилда туғилган турмуш ўртоғи Н.Г.ни қасддан ўлдириш мақсадида чап кўкрак қафаси орқа соҳасига икки марта зарб билан урган.
Н.Г. «Челак деҳқон бозори» ҳудудидаги 41-сонли дорихонага қочиб борганида А.Б. унинг ортидан таъқиб қилиб, қўлидаги ошхона пичоғи ёрдамида ўта шафқатсизлик билан ҳаёти учун муҳим чап ўпка ва чап курак соҳаларига, чап елка бўғими ва чап қўлтиқости соҳаларига пичоқ билан 9 марта зарба берган. Оқибатда Н.Г. воқеа жойида вафот этган.
Судга оид тиббиёт экспертизасининг хулосасига кўра, Н.Г.нинг ўлими етказилган тан жароҳатидан кейин ўткир қон кетиш билан кечган организмининг қонсизланиши оқибатида юз берган.
Судланувчи А.Б. ўзининг ғайриқонуний жиноий ҳаракатлари билан жавобгарликни оғирлаштирувчи ҳолатларда, яъни ўта шафқатсизлик ва безорилик оқибатида қасддан одам ўлдириб, Ўзбекистон Республикаси Жиноят Кодексининг 97-моддаси 2-қисми «ж», «л» бандларида назарда тутилган жиноятларни содир этганликда айбланмоқда.
Изоҳ (0)