Toshkent shahar Chilonzor tumanida joylashgan “Ugolok” kafesida mijozlar va kafe qo‘riqchilari o‘rtasida yuz bergan janjaldan keyin mijozlardan biri vafot etdi. Toshkent shahar IIBB mazkur holat bo‘yicha rasmiy ma’lumot berdi.
Xabar berilishicha, 2019-yil 28-oktabr kuni taxminan soat 21:00 da fuqarolar 24 yoshli Bobur Z. va 30 yoshli Murod A. Toshkent shahar Chilonzor tumanida joylashgan “Ugolok” kafesida kechgi taom bilan spirtli ichimlik iste’mol qilgan.
Shu vaqt mobaynida Bobur Z. mastlik bilan bog‘liq xatti-harakatlari oqibatida 21 yoshli Ahmadjon A. va 22 yoshli Dalerjon M. ismli kafe qo‘riqchilarining e’tiroz bildirishiga sababchi bo‘lgan va o‘rtada nizo kelib chiqqan.
Shundan so‘ng, ular “kelishib olish” uchun, ya’ni tortishuvni davom ettirish maqsadida kafedan tashqariga chiqib, mushtlashgan. Mushtlashuv oqibatida Bobur Z. yengil tan jarohati olib, tanishi Murod A. bilan taksiga chiqqan. Biroq birozdan so‘ng Murod A.ning mazasi bo‘lmayotganligi uchun ular avtomobildan tushgan.
Chilonzor tumani tez yordam xodimlari Murod A.ni tasodifan ko‘rib qolgan va kasalxonaga olib ketayotgan vaqtda u vafot etgan.
Murod A.ning o‘limi bo‘yicha olingan dastlabki sud tibbiy tashxisiga ko‘ra, o‘tkir yurak qon tomir yetishmovchiligi va spirtli ichimlikdan zaharlanish holatlari aniqlangan va hech qanday tan jarohati alomatlari yo‘qligi to‘g‘risida ma’lumot berilgan.
Hozirda ushbu holat Chilonzor tumani prokuraturasi tomonidan nazoratga olingan.
IIBB tomonidan ta’kidlanishicha, holat yuzasidan Chilonzor tumani IIB tomonidan Ahmadjon A. va Dalerjon M.ga nisbatan O‘zbekiston Respublikasi Jinoyat Kodeksining 277-moddasi (bezorilik) 2-qismi “b” bandi bo‘yicha jinoiy ish qo‘zg‘atilgan va tergov harakatlari davom etmoqda.
Toshkent shahar IIBB bezorilik jinoyati va Murod A.ning o‘limi o‘rtasidagi bog‘liqlikka tergov jarayonida aniqlik kiritilishi va natijasi bo‘yicha batafsil axborot berilishini ma’lum qildi.
Eslatib o‘tamiz, 2018-yil avgustida Yunusobodda joylashgan Aurum 898 tungi klubida ro‘y bergan pichoqbozlik oqibatida erkin kurashchi, xalqaro toifadagi sport ustasi Jamshid Kenjayev vafot etgandi.
Izoh (0)