29-oktabr kuni Afg‘onistonning Da Afghanistan Breshna Sherkat (DABS) ijrochi direktori Omonullo G‘olibdan “O‘zbekiston milliy elektr tarmoqlari” aksiyadorlik jamiyati boshqaruv raisi Dadajon Isaqulov nomiga rasmiy maktub keldi, deb xabar beradi O‘zA.
Unda yozilishicha, elektr energiyasi eksporti bo‘yicha imzolangan elektr energiyaning shartnomaviy miqdori tushib ketganiga ayni paytda ikkita omil ta’sir ko‘rsatmoqda. Birinchisi, Bog‘lon viloyati hududida jangarilar tomonidan olib borilayotgan jangovar harakatlar oqibati, ikkinchisi Afg‘onistondagi iqlim sharoiti, xususan, meteorologik va gidrologik sabablar (qor-loy ko‘chkisi, kuchli shamol) o‘tgan yilgi mavsumga nisbatan keskin tus olayotgani. Shunga qaramay, DABS shirkati muhandislari ta’mirlash-tiklash ishlarini olib bormoqda.
Bundan tashqari, 28-oktabr kuni soat 11:53 dan 19:07 gacha va 29-oktabr kuni soat 10:00 dan to hozirgi paytgacha Afg‘oniston energetiklari tomonidan olib borilayotgan texnik ta’mirlash ishlari xavfsiz bajarilishini ta’minlash maqsadida “Puli-Xumri” va “Chimtala” podstansiyalarini bog‘lovchi 220 kilovatlik havo elektr uzatish tarmog‘ining ikkinchi zanjiri o‘chirilgani ma’lum qilingan. Bu vaqt oralig‘ida Afg‘onistonga eksport amalga oshirilmadi va bu holat hanuzgacha davom etmoqda.
O‘zbekistondan Afg‘onistonga amalga oshirilayotgan elektr energiyasi eksporti masalasida barqarorlik mavjud emas.
Shu nuqtai nazardan “O‘zbekiston milliy elektr tarmoqlari” AJning axborot xizmati Afg‘oniston hukumati uzluksiz elektr ta’minotini tiklashda zarur choralarni ko‘rib, mavjud muammolarni bartaraf etishiga umid bildiradi.
Izoh (0)