Давлат статистика қўмитаси юридик шахс мақомига эга бўлган корхона ва ташкилотларда ишловчи ходимларнинг ўртача ойлик номинал ҳисобланган иш ҳақи тўғрисидаги маълумотларни эълон қилди.
2019 йил январь—сентябрь ойларида Ўзбекистон бўйича юридик шахс мақомига эга бўлган корхона ва ташкилотларда ишловчиларнинг ўртача ойлик номинал ҳисобланган иш ҳақи 2 213 400 сўмни (иш ҳақига устама, мукофот, рағбатлантириш хусусиятига эга тўловлар, компенсация ва ишланмаган вақт учун ҳақ каби тўловлар киритилган, шунингдек, унинг таркибида жисмоний шахслар даромад солиғи ва касаба уюшмасига тўловлар ҳам мавжуд) ташкил этиб, 2018 йилнинг мос даврига нисбатан 31,2 фоизга ўсди.
Хусусан, таълим соҳасида 23 298 та муассасада 1 013 300 нафар (жами ишловчиларга нисбатан улуши 38 фоиз) ходим ишлаган бўлиб, уларга ҳисобланган иш ҳақи фонди 15963,3 миллиард сўмни (жами иш ҳақи фондидаги улуши 30,1 фоиз) ташкил этган. Таълим соҳаси бўйича ўртача ойлик номинал ҳисобланган иш ҳақи 1 750 400 сўмни ташкил этиб, 2018 йилнинг мос даврига нисбатан 36,7 фоизга ошган.
Республикадаги ўртача ойлик номинал ҳисобланган иш ҳақига нисбатан сезиларли юқори кўрсаткичлар Тошкент шаҳри — 129,9 фоиз, Тошкент вилояти — 103,2 фоиз, Жиззах вилояти — 101,9 фоиз ва Наманган вилояти — 101,2 фоиз ҳиссасига тўғри келган.
Саноат соҳаси бўйича бир қатор ҳудудларда ўртача ойлик номинал ҳисобланган иш ҳақининг республика ўртача ойлик иш ҳақига нисбатан юқори кўрсаткичлари кузатилган. Шу билан бирга, республиканинг ўнта ҳудудида ушбу соҳадаги ўртача ойлик номинал ҳисобланган иш ҳақининг республика даражасидан паст эканлиги аниқланган.
Соғлиқни сақлаш ва ижтимоий хизматлар кўрсатиш соҳаси бўйича ўртача ойлик номинал ҳисобланган иш ҳақининг республикадаги ўртача ойлик иш ҳақига нисбатан юқори кўрсаткичлари Тошкент шаҳри 118,6 фоиз, Бухоро вилояти 111,9 фоиз, Қорақалпоғистон Республикаси 111,0 фоиз ва Сирдарё вилояти 109,0 фоиз ҳиссасига тўғри келган.
Изоҳ (0)